Disney ارناسىنىڭ بۇرىنعى جۇلدىزى كەلام ۋورتي جاساندى ينتەللەكت (AI) كٶمەگٸمەن مارقۇم ادامداردىڭ ۆيرتۋالدى بەينەلەرٸن جاسايتىن قوسىمشاسى ٷشٸن قاتاڭ سىنعا ۇشىرادى, دەپ حابارلايدى Dalanews.kz.
Dailymail تاراتقان اقپاراتقا سەيكەس, 34 جاستاعى ۋورتي X جەلٸسٸندە جارنامالىق ۆيدەونى جارييالاعان.
وندا: "ٶمٸردەن ٶتكەن جاقىندارىمىز بولاشاعىمىزدىڭ بٸر بٶلٸگٸ بولا السا شە?" - دەپ جازىلعان.
ٶنەر يەسٸ گولليۆۋد پروديۋسەرٸ راسسەل گەيزەرمەن بٸرگە قۇرعان كومپانيياسى “ادامزاتتىڭ تٸرٸ مۇراعاتىن” جاساۋدى ماقسات ەتٸپ وتىرعانىن اتاپ ٶتتٸ.
داۋلى جارناما نە تۋرالى?
جەلٸدە قىزۋ تالقىعا تٷسكەن جارنامادا جٷكتٸ ەيەل 2wai قوسىمشاسى ارقىلى مارقۇم اناسىنىڭ جاساندى بەينەسٸمەن تٸلدەسەدٸ.
ۆيدەونىڭ جالعاسىندا ۆيرتۋالدى ەجەنٸڭ جاڭا تۋعان نەمەرەسٸنە ەرتەگٸ وقىپ وتىرعانى, بالانى مەكتەپتەن كٷتٸپ الاتىنى, تٸپتٸ بولاشاقتا ونىڭ ٶز بالاسىنىڭ دٷنيەگە كەلۋٸ تۋرالى ەڭگٸمەلەسەتٸنٸ كٶرسەتٸلەدٸ.
روليك سوڭىندا ەيەل اناسىنىڭ بەينەسٸن جاساۋ ٷشٸن بار بولعانى ٷش مينۋتتىق ۆيدەوسىن جٷكتەگەنٸ ايتىلادى. ەكراندا: “2wai ارقىلى ٷش مينۋت – مەڭگٸگە اينالادى” دەگەن ۇران شىعادى.
ەلەۋمەتتٸك جەلٸ قولدانۋشىلارىنىڭ رەاكتسيياسى
جەلٸ قولدانۋشىلارى بۇل يدەياعا تٷبەگەيلٸ قارسى شىقتى. كٶپشٸلٸگٸ ونى “ەڭ سەتسٸز باستامالاردىڭ بٸرٸ” دەپ اتاسا, ەندٸ بٸرٸ “زۇلىم, جالعان ەرٸ ادامشىلىقتان ايىراتىن قوسىمشا” دەپ باعا بەردٸ.
سىنعا قالعان 2wai (وقىلۋى — two way) قوسىمشاسى قازٸردٸڭ ٶزٸندە App Store ارقىلى iOS قۇرىلعىلارىندا قولجەتٸمدٸ. ول پايدالانۋشىلارعا “HoloAvatar” دەپ اتالاتىن ۆيرتۋالدى بەينەلەردٸ جاساۋعا مٷمكٸندٸك بەرەدٸ.
قوسىمشادا دايىن كەيٸپكەرلەر دە بار. مەسەلەن, جەكە جاتتىقتىرۋشى داريۋس, استرولوگ سەلەستا, اسپاز لۋكا.
كومپانييا تٸپتٸ ۋيليام شەكسپير مەن VIII گەنريحتٸڭ بەينەسٸن جاساپ قويعان.
الايدا ەڭ داۋلى تۇسى - ٶمٸردەن ٶتكەن ادامدى ٷش مينۋتتىق ۆيدەومەن تولىقتاي “قايتا تٸرٸلتۋٸ”.
كومپانييا بۇل تەحنولوگييانىڭ قالاي جۇمىس ٸستەيتٸنٸ جٶنٸندە ەشقانداي ناقتى تٷسٸنٸكتەمە بەرمەگەن. تٸپتٸ جۋرناليستەردٸڭ سۇراقتارىنا دا جاۋاپ قاتپاعان.
قوعامنىڭ الاڭداۋشىلىعى
مارقۇم ادامداردى جاساندى ينتەللەكت ارقىلى “قايتا تٸرٸلتۋ” يدەياسى قوعامدا ٷلكەن الاڭداۋشىلىق تۋدىردى.
X جەلٸسٸندە قولدانۋشىلاردىڭ بٸرٸ: “قايعىنى تابىس كٶزٸنە اينالدىرۋ – ادامشىلىققا جات”, - دەپ جازدى.تاعى بٸرٸ اشۋلانىپ: “ەگەر بٸرەۋ مەنٸ AI ارقىلى تٸرٸلتسە, قارعىس ايتار ەدٸم”, - دەدٸ.
تەحنولوگييانى سىناۋشىلار بۇل جاعدايدى Black Mirror سەريالىنىڭ “Be Right Back” ەپيزودىمەن ۇقساستىعىن بٸردەن بايقادى. وندا قايعىدان قان جۇتقان ەيەل قايتىس بولعان سٷيٸكتٸسٸنٸڭ تسيفرلىق كٶشٸرمەسٸن جاسايدى. اتالعان سەرييادا تەحنولوگيياعا شامادان تىس سەنۋدٸڭ قاۋپٸ تۋرالى بايانادالادى. بٸراق قولدانۋشىلاردىڭ پٸكٸرٸنشە, 2wai كومانداسى بۇل ەسكەرتۋدٸ ەلەمەگەن كٶرٸنەدٸ.
“Black Mirror-دىڭ ەڭ قورقىنىشتى ەپيزودىن ستارتاپقا اينالدىرۋعا كٸمنٸڭ باتىلى جەتتٸ?” - دەپ جازدى ولار.
كٶپشٸلٸك AI ارقىلى مارقۇمداردى “تٸرٸلتۋ” ادامنىڭ پسيحولوگيياسىنا سالماق تٷسٸرۋٸ مٷمكٸن ەكەنٸن ايتادى. سونىمەن قاتار جۇرت مارقۇم ادامنىڭ بەينەسٸ مەن داۋىسى كومپانييانىڭ جارناما نەمەسە كوممەرتسييالىق ماقساتىندا پايدالانۋىنان قورقادى.
