Shymkentte 21 jastaǵy Nurai Serikbaidyń ólimine qatysty qylmystyq isti sotta qaraý bastaldy. Memlekettik aiyptaýshy jariialaǵan tergeý nusqasyna sáikes, aiyptalýshy boijetkenge barlyǵy 35 ret pyshaq jaraqatyn salǵan, dep habarlaidy dalanews.kz.
Sot otyrysynyń basynda sýdia aiyptalýshy Sherhan Aimahannan jeke basyna qatysty málimetterdi surady. Ol 33 jasta ekenin, Shymkent qalasynda týǵanyn, «energetik» mamandyǵy boiynsha joǵary bilim alǵanyn aitty. Sondai-aq úilenbegenin jáne buǵan deiin sottalmaǵanyn jetkizdi.
Jábirlenýshi tarap tikelei efir ótkizýdi surady
Marqumnyń otbasy ókilderiniń advokattary sot protsesin tikelei efirde kórsetýdi ótindi. Olardyń pikirinshe, qoǵamda úlken rezonans týdyrǵan is barynsha ashyq qaralýǵa tiis.
Advokattar transliatsiia qýdalaý men stalkingtiń qandai aýyr saldarǵa ákelýi múmkin ekenin kórsetýge kómektesetinin aitty. Sondai-aq bul basqa qyz-kelinshekterge óz quqyqtaryn qorǵaý joldaryn túsindirýge yqpal etedi dep esepteidi.
Alaida aiyptalýshynyń qorǵaýshylary sot otyrysyn tikelei kórsetýge qarsy boldy. Sýdia jábirlenýshi taraptyń ótinishin qanaǵattandyrmady.
Aiyptalýshy alqabiler sotynan bas tartty
Otyrysta Sherhan Aimahan qylmystyq istiń alqabilerdiń qatysýymen qaralýyn qalamaitynyn málimdedi. Osydan keiin memlekettik aiyptaýshy aiyptaý aktisin oqýǵa kiristi.
Tergeý nusqasy boiynsha, qylmys bolǵan kúni aiyptalýshy aldymen Nurai Serikbaiǵa bes ret pyshaq jaraqatyn salyp, oqiǵa ornynan ketip qalǵan. Alaida kóp uzamai qaita oralyp, boijetkenge taǵy 30 ret pyshaq suqqan.
Osylaisha, aiyptaý aktisinde jábirlenýshige barlyǵy 35 ret pyshaq jaraqaty salynǵany kórsetilgen.
