Túrmede otyrǵan marafonshy, qoǵam belsendisi Marat Jylanbaev taǵy ashtyq jariialady. Bul týraly onyń advokaty málimdedi, dep habarlaidy Dalanews.kz.
Marat Jylanbaev pen advokaty Meiirjan Dosqaraev 18 qarashada kezdesken. Advokattyń aitýynsha, marafonshy sottyń ózine qatysty shyqqan sheshimine narazylyq bildirip, 13 qarashada merzimsiz ashtyq aktsiiasyn bastaǵan. Sonymen qatar Jylanbaev túrmedegi sanitarlyq jaǵdaidyń nasharlyǵyn, tamaqtyń durys berilmeitinin jáne advokaty men dostaryna qońyraý shalýǵa múmkindik berilmeitinin atap ótken.
Aqmola oblysy boiynsha qylmystyq atqarý júiesi departamenti №4 mekemesi bul jaǵdaiǵa túsinik bermedi.
Eske salaiyq, 2023 jyly jabyq sottyń nátijesinde 7 jyl túrmege kesilgen tanymal marafonshy Marat Jylanbaevtyń aty-jóni "ekstremizm men terrorizmdi qarjylandyrýǵa qatysy bar" tulǵalardyń tiziminde paida bolǵan edi.
Tizim Qazaqstan qarjy monitoring agenttiginiń saitynda jariialandy. Jylanbaev tizimge 8 sáýirde engizilgen.
Buǵan qatysty pikir bildirgen Marat Jylanbaevtyń advokaty Meiirjan Dosqaraev sovet kezin eske aldy.
"Sovet kezinde quqyqtan aiyratyn baptar boldy, dál qazir sondai nárse júrip jatyr" dedi advokat Azattyqqa bergen suqbatynda.
"Bul zańsyz. Muny retteitin zańdar bar. Olar Konstitýtsiiaǵa qaishy dep oilaimyn. Sebebi adam ómir súrýi kerek, nápaqa taba alýy kerek, qandai da bir áreket jasai alýy kerek. Al jeke sáikestendirý nómiri shektelgen adam ne istei alady? Tipti shetel azamattary kóbirek quqyqqa ie" dedi ol.
Halyqaralyq quqyq qorǵaý uiymdary, arasynda Amnesty International jáne Human Rights Watch ta bar, Qazaqstan biligin Marat Jylanbaevty bosatýǵa úndegen.
"Belsendi, tanymal marafonshy Marat Jylanbaev beibit áreketi men saiasi ustanymy úshin jeti jylǵa bas bostandyǵynan aiyryldy" dedi Amnesty International jeltoqsandaǵy málimdemesinde.
60 jastaǵy Marat Jylanbaev keiingi jyldary bilikti synap, beibit narazylyq aktsiialaryna qatysqan.
Qańtar aiynda Marat Jylanbaev Stepnogorsk túrmesine aýystyrylǵan. Onyń qamaýda otyrǵanyna 11 aidan asty, onyń kóbin tergeý izoliatorda ótkizgen. Ol byltyr kóktemde saiasi tutqyndardy qoldap, beibit aktsiiasyn ótkizgennen keiin 20 táýlikke qamaldy, izinshe mamyrda tergeý izoliatoryna aýystyrylǵan.
