تۇرمەدە وتىرعان مارافونشى، قوعام بەلسەندىسى مارات جىلانبايەۆ تاعى اشتىق جاريالادى. بۇل تۋرالى ونىڭ ادۆوكاتى مالىمدەدى، دەپ حابارلايدى Dalanews.kz.

مارات جىلانبايەۆ پەن ادۆوكاتى مەيىرجان دوسقارايەۆ 18 قاراشادا كەزدەسكەن. ادۆوكاتتىڭ ايتۋىنشا، مارافونشى سوتتىڭ وزىنە قاتىستى شىققان شەشىمىنە نارازىلىق ءبىلدىرىپ، 13 قاراشادا مەرزىمسىز اشتىق اكسياسىن باستاعان. سونىمەن قاتار جىلانبايەۆ تۇرمەدەگى سانيتارلىق جاعدايدىڭ ناشارلىعىن، تاماقتىڭ دۇرىس بەرىلمەيتىنىن جانە ادۆوكاتى مەن دوستارىنا قوڭىراۋ شالۋعا مۇمكىندىك بەرىلمەيتىنىن اتاپ وتكەن. 

اقمولا وبلىسى بويىنشا قىلمىستىق اتقارۋ جۇيەسى دەپارتامەنتى №4 مەكەمەسى بۇل جاعدايعا تۇسىنىك بەرمەدى. 

ەسكە سالايىق، 2023 جىلى جابىق سوتتىڭ ناتيجەسىندە 7 جىل تۇرمەگە كەسىلگەن تانىمال مارافونشى مارات جىلانبايەۆتىڭ ءاتى-جونى "ەكسترەميزم مەن تەرروريزمدى قارجىلاندىرۋعا قاتىسى بار" تۇلعالاردىڭ تىزىمىندە پايدا بولعان ەدى.

ءتىزىم قازاقستان قارجى مونيتورينگ اگەنتتىگىنىڭ سايتىندا جاريالاندى. جىلانبايەۆ تىزىمگە 8 ساۋىردە ەنگىزىلگەن.

بۇعان قاتىستى پىكىر بىلدىرگەن مارات جىلانبايەۆتىڭ ادۆوكاتى مەيىرجان دوسقارايەۆ سوۆەت كەزىن ەسكە الدى.

"سوۆەت كەزىندە قۇقىقتان ايىراتىن باپتار بولدى، ءدال ءقازىر سونداي نارسە ءجۇرىپ جاتىر" دەدى ادۆوكات ازاتتىققا بەرگەن سۇقباتىندا.

"بۇل زاڭسىز. مۇنى رەتتەيتىن زاڭدار بار. ولار كونستيتۋسياعا قايشى دەپ ويلايمىن. سەبەبى ادام ءومىر ءسۇرۋى كەرەك، ءناپاقا تابا الۋى كەرەك، قانداي دا ءبىر ارەكەت جاساي الۋى كەرەك. ال جەكە سايكەستەندىرۋ ءنومىرى شەكتەلگەن ادام نە ىستەي الادى؟ ءتىپتى شەتەل ازاماتتارى كوبىرەك قۇقىققا يە" دەدى ول.

حالىقارالىق قۇقىق قورعاۋ ۇيىمدارى، اراسىندا Amnesty International جانە Human Rights Watch تا بار، قازاقستان بيلىگىن مارات جىلانبايەۆتى بوساتۋعا ۇندەگەن.

"بەلسەندى، تانىمال مارافونشى مارات جىلانبايەۆ بەيبىت ارەكەتى مەن ساياسي ۇستانىمى ءۇشىن جەتى جىلعا باس بوستاندىعىنان ايىرىلدى" دەدى Amnesty International جەلتوقسانداعى مالىمدەمەسىندە.

60 جاستاعى مارات جىلانبايەۆ كەيىنگى جىلدارى بيلىكتى سىناپ، بەيبىت نارازىلىق اكسيالارىنا قاتىسقان.

قاڭتار ايىندا مارات جىلانبايەۆ ستەپنوگورسك تۇرمەسىنە اۋىستىرىلعان. ونىڭ قاماۋدا وتىرعانىنا 11 ايدان استى، ونىڭ كوبىن تەرگەۋ يزولياتوردا وتكىزگەن. ول بىلتىر كوكتەمدە ساياسي تۇتقىنداردى قولداپ، بەيبىت اكسياسىن وتكىزگەننەن كەيىن 20 تاۋلىككە قامالدى، ىزىنشە مامىردا تەرگەۋ يزولياتورىنا اۋىستىرىلعان.