Maqtaaraldyq sharýalar Qarabulaqta
Qarashanyń alǵashqy juldyzynda mal sharýashylyǵy salasyndaǵy ozyq tájiribelerdi úirený úshin bir top maqtaaraldyqtar «Qarabulaqqa» is-saparmen bardy. Aýdanymyzdyń ár okrýginen jinalǵan sharýalardy aýdandyq aýyl sharýashylyǵy bóliminiń basshysy Óser Myrzamdanov pen osy bólimniń bas mamany Talǵat Kalenov bastap júrdi.
Bul is-saparǵa QR Aýyl sharýashylyǵy ministrliginiń Túrkistan oblysy boiynsha ókili Tursynbai Berdaliev sebepker bolǵan. Ol maqtaaraldyq sharýalarǵa qarabulaqtyqtardyń tájiribeleri týraly qundy derekter aityp, osyndai iri mal sharýashylyǵyn Maqtaaralda qurýǵa shaqyrdy.
Maqtaaraldyq sharýalar jeke kásipkerler Alimjan men Bahtiiar Shadyqulovtarǵa tiesili "Shosh" sharýaqojalyǵyndaǵy iri qarany bordaqylaý kesheninde boldy. Aýmaǵy 70 sottyq jerdi quraityn bul keshende iri qarany bordaqylaýǵa qajetti barlyq jaǵdailar jasalynypty. Munda búginde 200-den astam ógiz bordaqylanǵan. Sonymen qatar, sáýir aiynan qara kúzge deiin jylqy maly da bordaqylanatyny belgili boldy.
Maqtaaraldyq sharýalardyń mal bordaqylaýǵa qatysty qoiǵan suraqtaryna keshen ielerinen bólek, "Qarabulaq" aýyldyq okrýginiń mal dárigeri Babýr esimdi azamat jan-jaqty jaýap berdi. Búginde kásipkerler Alimjan men Bahtiiar iri qaralardyń etin Jambyl oblysy, Almaty qalasy men Ózbekstan Respýblikasyna bazardaǵy naryqtan 50-100 teńgege arzanǵa saýdalap jatqanyn, sondai-aq jergilikti et soiý oryndary da ónimin joǵary baǵamen satyp alatynyn aitty. Sondyqtan, olar óz ónimderin ótkizýden eshqandai qiynshylyq kórmeidi eken.
Keshen qurylysymen jáne maldardy baǵylý jaiymen tanysyp, ózderin qyzyqtyrǵan suraqtarǵa naqty jaýaptar alǵan maqtaaraldyq sharýalar osy sharany uiymdastyrýshylarǵa óz rizashylyqtaryn bildirdi. Sondai-aq, olar alǵan tájiribelerin paidalanyp, iri mal sharýashylyǵyn qurýdy josparlap júrgenderin aitty.
Maqtaaral aýdany ákiminiń baspasóz qyzmeti
