قاراشانىڭ العاشقى جۇلدىزىندا مال شارۋاشىلىعى سالاسىنداعى وزىق تاجىريبەلەردى ۇيرەنۋ ءۇشىن ءبىر توپ ماقتاارالدىقتار «قارابۇلاققا» ىس-ساپارمەن باردى. اۋدانىمىزدىڭ ءار وكرۋگىنەن جينالعان شارۋالاردى اۋداندىق اۋىل شارۋاشىلىعى ءبولىمىنىڭ باسشىسى وسەر مىرزامدانوۆ پەن وسى ءبولىمنىڭ باس مامانى تالعات كالەنوۆ باستاپ ءجۇردى.
بۇل ءىس-ساپارعا ق ر اۋىل شارۋاشىلىعى مينيسترلىگىنىڭ تۇركىستان وبلىسى بويىنشا وكىلى تۇرسىنباي بەردالييەۆ سەبەپكەر بولعان. ول ماقتاارالدىق شارۋالارعا قارابۇلاقتىقتاردىڭ تاجىريبەلەرى تۋرالى قۇندى دەرەكتەر ايتىپ، وسىنداي ءىرى مال شارۋاشىلىعىن ماقتاارالدا قۇرۋعا شاقىردى.
ماقتاارالدىق شارۋالار جەكە كاسىپكەرلەر اليمجان مەن باحتيار شادىقۇلوۆتارعا تيەسىلى "شوش" شارۋاقوجالىعىنداعى ءىرى قارانى بورداقىلاۋ كەشەنىندە بولدى. اۋماعى 70 سوتتىق جەردى قۇرايتىن بۇل كەشەندە ءىرى قارانى بورداقىلاۋعا قاجەتتى بارلىق جاعدايلار جاسالىنىپتى. مۇندا بۇگىندە 200-دەن استام وگىز بورداقىلانعان. سونىمەن قاتار، ءساۋىر ايىنان قارا كۇزگە دەيىن جىلقى مالى دا بورداقىلاناتىنى بەلگىلى بولدى.
ماقتاارالدىق شارۋالاردىڭ مال بورداقىلاۋعا قاتىستى قويعان سۇراقتارىنا كەشەن يەلەرىنەن بولەك، "قارابۇلاق" اۋىلدىق وكرۋگىنىڭ مال دارىگەرى بابۋر ەسىمدى ازامات جان-جاقتى جاۋاپ بەردى. بۇگىندە كاسىپكەرلەر اليمجان مەن باحتيار ءىرى قارالاردىڭ ەتىن جامبىل وبلىسى، الماتى قالاسى مەن وزبەكستان رەسپۋبليكاسىنا بازارداعى نارىقتان 50-100 تەڭگەگە ارزانعا ساۋدالاپ جاتقانىن، سونداي-اق جەرگىلىكتى ەت سويۋ ورىندارى دا ءونىمىن جوعارى باعامەن ساتىپ الاتىنىن ايتتى. سوندىقتان، ولار ءوز ونىمدەرىن وتكىزۋدەن ەشقانداي قيىنشىلىق كورمەيدى ەكەن.
كەشەن قۇرىلىسىمەن جانە مالداردى باعىلۋ جايىمەن تانىسىپ، وزدەرىن قىزىقتىرعان سۇراقتارعا ناقتى جاۋاپتار العان ماقتاارالدىق شارۋالار وسى شارانى ۇيىمداستىرۋشىلارعا ءوز ريزاشىلىقتارىن ءبىلدىردى. سونداي-اق، ولار العان تاجىريبەلەرىن پايدالانىپ، ءىرى مال شارۋاشىلىعىن قۇرۋدى جوسپارلاپ جۇرگەندەرىن ايتتى.
ماقتاارال اۋدانى اكىمىنىڭ باسپا ءسوز قىزمەتى
