Búgingi kúnge deiin sý astynda qalǵan aýyldardan 908 bas úi janýarlarynyń óleksesi shyǵaryldy. Olardyń ishinde 856 usaq mal, 39 iri qara, 7 jylqy, 6 túie bar.
Ólgen maldan tazartylǵan aýmaqtardy jaǵymsyz iis pen ziiandy qaldyqtardan aryltý úshin 219 tonna arnaiy dári sebý arqyly zalalsyzdandyrý júrgiziledi. Qazirgi tańda ol dárilerdiń 100 tonnasy jetkizildi.
Aýa-raiy qolaisyzdyq týdyrmasa 5 kún ishinde 4 million 188 myń sharshy metr aýmaqty dárileý jumystary júrgizilip bitedi dep josparlanýda. Bul týraly Túrkistan oblysy Aýyl sharýashylyǵy basqarmasynyń veterinariialyq sharalardy uiymdastyrý bóliminiń bas mamany Taǵaev Arman málimdedi.
Degenmen, sý astynan shyqqan mal ólikteriniń kópshiligi Ózbekstan Respýblikasyna tiesili bolǵandyqtan olarǵa arnaiy mal aýrýlaryna arnalǵan vaktsina egilgeni jóninde málimet joq. Sondyqtan, ondaǵy mal ólikterin jep, aýrý taratý qaýpi týyndap, sol aimaqtaǵy itterdiń de kózin joiý jumystary egelerine eskertý arqyly júrip jatyr.
Sonymen qatar, topan sýmen birge aǵyp kelgen balyqtardyń da synamalary alynyp, balyq inspektsiiasy laborotoriialyq zertteý jumystaryn júrgizýde. Zertteý nátijeleri anyqtalǵansha balyq aýlaýǵa ruqsat berilmeidi.
Bul jumystardyń barlyǵyna arnaiy tehnikalar jumyldyrylǵan.
Atap óteiik, aýyl sharýashylyǵy basqarmasynyń málimetinshe, Sibir jarasynyń oshaqtary tirkelmegen.
Túrkistan oblysynyń Óńirlik kommýnikatsiialar qyzmeti
