Oblys ákimi J.Túimebaevtyń arnaiy tapsyrmasyna sáikes, Maqtaaral aýdany ákiminiń apparaty aqparattandyrý, memlekettik qupiialardy qorǵaý jáne memlekettik qyzmet kórsetý monitoringi bóliminiń, aýdandyq ishki saiasat, mádeniet jáne tilderdi damytý bóliminiń uiymdastyrýymen «Dástúrli qundylyqtar kerýeni» taqyrybyndaǵy kóshpeli jiyn Maqtaaral aýdanyna keldi.
Turǵyndardyń mádeni jáne rýhani sezimderin qalyptastyrý, destrýktivti dini aǵym jaqtastaryn qazaqstandyq qoǵam qundylyqtaryna beiimdeý, memleket pen din araqatynasyndaǵy zaiyrlylyq ustanymy boiynsha halyqty aqparattandyrý – dástúrli qundylyqtar kerýeniniń basty maqsaty.
Eń aldymen jiynǵa qatysqan qonaqtar destrýktivti dini aǵymdardyń zardabyn kórgen keiipkerler týraly videorolikti tamashalady.
Erkin formatta ótken jiyndy aýdan ákiminiń orynbasary Altyn Eshanqulova júrgizip otyrdy. Sondai-aq, kóshpeli is-sharaǵa oblys ákimi aparatynyń quqyq bóliminiń basshysy N.Eshenqulov, bólimniń bas inspektory E.Mustafa, oblystyq din isteri basqarmasy «Din máselelerin zertteý ortalyǵy» mekemesi direktorynyń orynbasary M.Bespaev, oblystyq mádeniet jáne tilderdi damytý basqarmasy, Halyq shyǵarmashylyǵy ortalyǵynyń bólim basshysy Sh.Mamythanovalar qatysty.
«Din – asa muqiiattylyqty, tereń zertteýdi, biik saýattylyqty, ásirese, jan tazalyǵyn qajet etedi. Sondyqtan osy qasietterdi halyqqa jetkizip, jetildirip otyrý kerek. Sonda ǵana jurttyń dinge degen senimi artyp, ustanymyna selkeý túspeitin bolady. Osyǵan orai, oblys ákiminiń bastamasymen aimaqtarǵa jol tartqan «Dástúrli qundylyqtar kerýeni» jobasy jerlesterimizdiń ulttyq qundylyqqa degen ustanymyn bekemdep, dástúrli dinge degen kózqarasyn qalyptastyrýda zor múmkindik berdi. Tipti, atalmysh joba aýdan turǵyndarynyń arasynda dástúrli rýhani mádenietti ilgeriletý, memleketimizdiń rýhani tiregi bolǵan asyl dinimizdiń jalpyǵa ortaq adamgershilik qaǵidalaryn nasihattaýdy ózek etedi» - dedi A. Eshanqulova.
Aita keteiik, kóshpeli jiyn maqtaaraldyqtarǵa rýhani qundylyqtardy jańǵyrtý jáne halyqtyń ulttyq sanasyn oiatý arqyly teris piǵyldy dini aǵymdarmen qarsy kúresýdiń mádenietti jolyn túsindirdi. Sondai-aq, rýhani sanasyn jańǵyrtý, salt-dástúr, mádenietimizdi kózdiń qarashyǵyndai saqtai bilý jáne taǵylymy mol tarihymyzdy qasterleýdiń qundylyǵyn árbir azamatqa uǵyndyrdy
