Qazirdiń ózinde aýdanda 80-nen asa mal bordaqylaý alańdary jumys istep jatqany belgili boldy. Bul týraly aýdandaǵy mal bordaqylaý alańdarynyń jumys barysymen tanysqan aýdan ákimi Baqyt Asanov málimdedi.
Eń aldymen óńir basshysy «Israılov» sharýa qojalyǵyna atbasyn buryp, 20-ǵa jýyq buqany bordaqylap jatqan Israılov Táńirbergenniń jumysymen tanysty. Mundaǵy mal bordaqylaý alańy 50 bas malǵa arnalǵan. «Yrys» qarjy uıymynan nesıe alý úshin qujattar tapsyrǵan Táńirbergen bordaqylanatyn mal sanyn kóbeıtpekshi. Sondaı-aq, óndirgen etti eksportqa deıin shyǵarýdy kózdep otyr.
Qojalyq basshysy jem-shóptiń qymbattylyǵyn alǵa tartyp qazirgi tańda Óskemen qalasynda óndiriletin kombıkormdy paıdalanýda eken. Quramynda 21 túrli qospasy bar mal óniminiń 1 tostaǵy 1 iri qarany kúni boıy toıdyra alady. Bıdaı, kebek, kúnbaǵys, antıoksıdant, ferment, premıks sıaqty t.b. qospasy bar, tipti balyqtyń maıyna deıin qosylǵan kombıkormnyń baǵasy sharýaǵa qolaıly bolýda.
– Jep-shóp pen kombıkormǵa ketetin shyǵyndardy eseptep shyqtym. Kombıkormdy paıdalaný arqyly 2 ese qarjym únemdeldi. Sondyqtan, mal bordaqylaıtyn barlyq áriptesterime jańa tehnologıaǵa kóshýdi usynamyn, – dedi T.Israılov.
Munan soń aýdan basshysy «Temirbolat»sharýa qojalyǵyna aıaldady. Qojalyqtyń basshysy Temirbolatov Rústem 50 bas buqany bordaqylaýda. Negizinen óndirgen etin ishki naryqqa satady. İri qaranyń erekshe tuqymyn 3 aı boıy bordaqylap, árbir mal basynan ortasha 300-350 keli et óndirýde.
Rústem Temirbolatovtyń 4 gektar jeri bar. Qaýyn ósirip, ónimin shetelge eksporttaǵan ol qaldyqsyz ónim shyǵarý úshin mal bordaqylaý alańyn ashqan. Atap aıtqanda, eksportqa jaramsyz, suryptaýdan ótpegen qaýyndardy kebekpen aralastyryp, maldaryn jemmen qamtamasyz etip otyr. Sondaı-aq, ol bul kásippen birneshe aýyldastary aınalysyp jatqanyn atap ótti.
Aýdan ákimi B.Asanovtyń sońǵy tanysqan jobasy – «Sattar» sharýa qojalyǵy. 100 bas malǵa arnalǵan bordaqylaý alańy jańadan salynǵan. Tipti, alań jeldetkishke deıin jabdyqtalyp, bordaqylanyp jatqan maldardyń artyq qımyl jasmaýy úshin bar jaǵdaı jasalǵan. Qojalyqtyń tóraǵasy Sattarov Uzaqbaı qazirdiń ózinde 60 bas iri qarany bordaqylaýda.
Aıta keteıik, jalpy Maqtaaral aýdanynda jyl basynan beri 4000 tonna et óndirilgen. Al, onyń 600 tonnasy mal bordaqylaý alańdaryna tıesili. Búgingi tańda maqtaaraldyqtar 43848 iri qara, 53225 usaq mal, 6558 jylqy, 411 túıe, 486 shoshqa, 67757 qusty baǵyp otyr.
Maqtaaral aýdany ákiminiń baspasóz qyzmeti
