ءقازىردىڭ وزىندە اۋداندا 80-نەن اسا مال بورداقىلاۋ الاڭدارى جۇمىس ىستەپ جاتقانى بەلگىلى بولدى. بۇل تۋرالى اۋدانداعى مال بورداقىلاۋ الاڭدارىنىڭ جۇمىس بارىسىمەن تانىسقان اۋدان اكىمى باقىت اسانوۆ مالىمدەدى.
ەڭ الدىمەن ءوڭىر باسشىسى «يسرايلوۆ» شارۋا قوجالىعىنا اتباسىن بۇرىپ، 20-عا جۋىق بۇقانى بورداقىلاپ جاتقان يسرايلوۆ تاڭىربەرگەننىڭ جۇمىسىمەن تانىستى. مۇنداعى مال بورداقىلاۋ الاڭى 50 باس مالعا ارنالعان. «ىرىس» قارجى ۇيىمىنان نەسيە الۋ ءۇشىن قۇجاتتار تاپسىرعان تاڭىربەرگەن بورداقىلاناتىن مال سانىن كوبەيتپەكشى. سونداي-اق، وندىرگەن ەتتى ەكسپورتقا دەيىن شىعارۋدى كوزدەپ وتىر.
قوجالىق باسشىسى جەم-شوپتىڭ قىمباتتىلىعىن العا تارتىپ قازىرگى تاڭدا وسكەمەن قالاسىندا وندىرىلەتىن كومبيكورمدى پايدالانۋدا ەكەن. قۇرامىندا 21 ءتۇرلى قوسپاسى بار مال ءونىمىنىڭ 1 توستاعى 1 ءىرى قارانى كۇنى بويى تويدىرا الادى. بيداي، كەبەك، كۇنباعىس، انتيوكسيدانت، فەرمەنت، پرەميكس سياقتى ت.ب. قوسپاسى بار، ءتىپتى بالىقتىڭ مايىنا دەيىن قوسىلعان كومبيكورمنىڭ باعاسى شارۋاعا قولايلى بولۋدا.
– جەپ-شوپ پەن كومبيكورمعا كەتەتىن شىعىنداردى ەسەپتەپ شىقتىم. كومبيكورمدى پايدالانۋ ارقىلى 2 ەسە قارجىم ۇنەمدەلدى. سوندىقتان، مال بورداقىلايتىن بارلىق ارىپتەستەرىمە جاڭا تەحنولوگياعا كوشۋدى ۇسىنامىن، – دەدى ت.يسرايلوۆ.
مۇنان سوڭ اۋدان باسشىسى «تەمىربولات»شارۋا قوجالىعىنا ايالدادى. قوجالىقتىڭ باسشىسى تەمىربولاتوۆ رۇستەم 50 باس بۇقانى بورداقىلاۋدا. نەگىزىنەن وندىرگەن ەتىن ىشكى نارىققا ساتادى. ءىرى قارانىڭ ەرەكشە تۇقىمىن 3 اي بويى بورداقىلاپ، ءاربىر مال باسىنان ورتاشا 300-350 كەلى ەت وندىرۋدە.
رۇستەم تەمىربولاتوۆتىڭ 4 گەكتار جەرى بار. قاۋىن ءوسىرىپ، ءونىمىن شەتەلگە ەكسپورتتاعان ول قالدىقسىز ءونىم شىعارۋ ءۇشىن مال بورداقىلاۋ الاڭىن اشقان. اتاپ ايتقاندا، ەكسپورتقا جارامسىز، سۇرىپتاۋدان وتپەگەن قاۋىنداردى كەبەكپەن ارالاستىرىپ، مالدارىن جەممەن قامتاماسىز ەتىپ وتىر. سونداي-اق، ول بۇل كاسىپپەن بىرنەشە اۋىلداستارى اينالىسىپ جاتقانىن اتاپ ءوتتى.
اۋدان اكىمى ب.اسانوۆتىڭ سوڭعى تانىسقان جوباسى – «ساتتار» شارۋا قوجالىعى. 100 باس مالعا ارنالعان بورداقىلاۋ الاڭى جاڭادان سالىنعان. ءتىپتى، الاڭ جەلدەتكىشكە دەيىن جابدىقتالىپ، بورداقىلانىپ جاتقان مالداردىڭ ارتىق قيمىل جاسماۋى ءۇشىن بار جاعداي جاسالعان. قوجالىقتىڭ ءتوراعاسى ساتتاروۆ ۇزاقباي ءقازىردىڭ وزىندە 60 باس ءىرى قارانى بورداقىلاۋدا.
ايتا كەتەيىك، جالپى ماقتاارال اۋدانىندا جىل باسىنان بەرى 4000 توننا ەت وندىرىلگەن. ال، ونىڭ 600 تونناسى مال بورداقىلاۋ الاڭدارىنا تيەسىلى. بۇگىنگى تاڭدا ماقتاارالدىقتار 43848 ءىرى قارا، 53225 ۇساق مال، 6558 جىلقى، 411 تۇيە، 486 شوشقا، 67757 قۇستى باعىپ وتىر.
ماقتاارال اۋدانى اكىمىنىڭ باسپا ءسوز قىزمەتى
