Aýdan qaita qurylǵan 5 jyl ishinde 3 aýysymdy mektepterdiń sanyn azaitý jáne yńǵailastyrylǵan mektepterdi joiý maqsatynda 17 mekteptiń jańa ǵimaraty salynyp, paidalanýǵa berildi. Onyń ishinde, 1200 oryndyq, 600 oryndyq, 300 jáne 200 oryndyq mektepter bar. Al biyl Maqtaaral aýdanynda Erkinabad, Azamat, Órkeniet jáne Nurlyjol eldi mekenderinen 200 oryndyq 4 mekteptiń qurylysy qolǵa alyndy.
Jańa bilim ordasynyń qurylys sapasyn baqylaýǵa arnaiy barǵan oblys ákimi Darhan Satybaldy bilim salasyn qoldaý kórsetý jalǵasatynyn aitty. Merdigermen jáne jergilikti turǵyndarmen kezdesip, qurylys sapasy basty nazarda ekenin jetkizdi.
– Memleket basshysy Qasym-Jomart Toqaev elimizde bilim salasyn damytýǵa jaǵdai jasaýdy, mektep tapshylyǵyn joiýdy tapsyrdy. Osy maqsatta oblysymyzda júieli jumys atqaryldy. Biyl óńirde memlekettik biýdjet esebinen 33 mekteptiń qurylysy júrip jatyr. Onyń 20-sy biyl tapsyrylsa, qalǵany 2024 jylǵa ótpeli. Endi jańa ǵimarattarda bilim berý isin de jańasha jandandyryp, aýyl balalarynyń bilimin kóterý kerek, – dedi Darhan Satybaldy.
Buryn balalary kórshi aýylǵa qatynap oqityn aýyl turǵyndary jańa bilim uiasyn ashýǵa qoldaý kórsetken óńir, aýdan basshylyǵyna rizashylyqtaryn bildirip, alǵystaryn jetkizdi.
Jańa mektepte oqýshylardyń sapaly bilim alýy úshin barlyq jaǵdai qarastyrylǵan. Ǵimaratta fizika, himiia, informatika, tehnologiia kabinetteri, mýltimediialyq jáne lingafondyq kabinetter sońǵy úlgidegi zamanaýi tehnologiialarmen jabdyqtalǵan. Sondai-aq kitaphanasy, sport zaly, ashanasy bar. Jalpy munda oqýshylar túrli sport, óner jáne qolóner úiirmelerine qatysa alady. Nysannyń qasbetine de, jaryqtandyrý jáne abattandyrý jumystaryna da erekshe kóńil bólingen.
Aita keteiik, El Prezidenti Qasym-Jomart Toqaevtyń arnaiy tapsyrmasymen «Jaily mektep» pilottyq jobasy aiasynda Túrkistan oblysynda 63 mektep salynady. Al Maqtaaral aýdanynda osy joba arqyly jańadan 5 mekteptiń qurylysy josparlanýda. Qazirgi tańda 1500 oryndyq jáne 600 oryndyq 2 mekteptiń qurylys jumystary bastaldy.
