Aýdan basshysy B.Asanov tazalyq jumysynyń barysymen tanysý úshin aýdan ortalyǵy Myrzakent kenti men Atakent kentterin aralap kórdi. Senbilik barysynda ortalyq kóshelerdegi tozǵan bılbordtardy dereý jańartyp, kásipkerler tarapynan beıresmı ilingen jarnamalyq bannerlerdi alyp tastaý úshin tıis mekemelerge tapsyrma berdi.
– Aýdannyń kireberisinen bastap Myrzakent kentine deıingi respýblıkalyq joldardyń boıynda 90 jyldyq mereıtoıǵa baılanysty bılbordtar ornatylýy tıis. Turǵyndar merekelik kóńil-kúıde bolýy úshin Myrzakent pen Atakent kentteriniń ortalyq kóshelerine lentalar ilinip, tazalyq barlyq jerde saqtalýy kerek, – dedi Baqyt Násirhanuly.
Senbilikke memlekettik qyzmetkerlerden bastap, bilim, sport, densaýlyq saqtaý mekemeleriniń, jekemenshik mekemelerdiń qyzmetkerleri belsene qatysty.
Aıta keteıik, aýdan kóleminde ótken tazalyq is-sharasyna 2 kent, 9 aýyldyq okrýgten 2 myńnan asa adam jáne 30-dan asa tehnıka qatysyp, 410 tonna retsiz kúl-qoqys shyǵaryldy. 48 shaqyrym kósheniń boılary, 12 shaqyrym aıaqjoldar tazalanyp, retke keltirildi. Odan bólek, kópqabatty úılerdiń aýmaqtary men kireberisteri, 1431 sharshy metr úı irgelik aýlalar, 903 shaqyrymdy quraıtyn ırrıgasıalyq júıeler qoqystan aryldy.
Maqtaaral aýdany ákiminiń baspasóz qyzmeti
