– 15 qarasha – Ulttyq valúta kúni jáne elimizdegi qarjygerler qaýymynyń kásibı merekesi ekeni belgili. Bıyl osy ataýly merekeler aýdanymyzdyń 90 jyldyq mereıtoıy aıasynda ótip jatyr. Teńge – elimizdiń qarjylyq táýelsizdiginiń sımvoly. Tól valútamyz damýdyń jańa deńgeıine jol ashyp, jańa naryqtyq ekonomıkanyń qurylymdaryn qalyptastyrýdy qamtamasyz ete aldy. Tól valútamyz ǵana táýelsiz ekonomıkalyq jáne qarjy-nesıelik saıasatty júzege asyrýymyzǵa, naqty ekonomıkalyq egemendikke qol jetkizýimizge múmkindik týǵyzdy, – dedi B.Tórebekov.
Aıta keteıik, 1992 jyldyń 27 tamyzy kúni Ulttyq bank teńge kýpúrasynyń úlgilerin bekitti. Ertesine qazaq valútasyn ómirge keltirgen sýretshiler Tımýr Súleımenov, Meńdibaı Alın, Aǵymsaly Dúzelhanov, Qaırolla Ábjálelovter Anglıaǵa attandy. Teńge Ulybrıtanıada basylyp shyqty.
1993 jyldyń 12 qarashasy kúni Elbasy Nursultan Nazarbaev «Qazaqstan Respýblıkasynda ulttyq valúta engizý týraly» Jarlyqqa qol qoıdy. Dál osy jyly 15 qarashada Qazaqstannyń ulttyq valútasy — teńge aınalysqa engizildi.
Eski aqshany qazaqstandyq teńgege aıyrbastaý 1993 jyly 15 qarashada saǵat 8.00-de bastalyp, 20 qarashada saǵat 20.00-de aıaqtaldy. Ulttyq Bank bastapqyda 1 teńgeni sol kezdegi myń rúblge baǵalaǵan bolatyn. Degenmen, elimizdiń saıası, áleýmettik máseleleri jáne memleketaralyq qatynastar eskerilip 1 teńge 500 somǵa bekitildi.
Maqtaaral aýdany ákiminiń baspasóz qyzmeti
