Jańa nysannyń ashylý saltanatyna aýdan ákimi Baqyt Asanov qatysyp, aýyl turǵyndary men mektep ujymyn, oqýshylardy quttyqtady.
– Qajymuqan atyndaǵy jańa mektepti qosqanda bıyl aýdanymyzda jalpy sany 5 mektepti el ıgiligine berip otyrmyz. Aýdanymyzdaǵy 3 aýysymmen oqıtyn jalǵyz mektepke ǵımarat salyp berý arqyly Elbasymyz N.Á.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıtylǵan 3 aýysymmen oqıtyn mektepterdiń qataryn boldyrmaý jónindegi tapsyrmasyn oryndadyq. Qazirgi tańda aýdanda 2 mekteptiń qurylysy júrip jatsa, taǵy 5 mekteptiń qurylysy bastalǵaly tur. Bizdiń endigi mindetimiz – jyl saıyn 5-6 mektep salý arqyly 2 aýysymmen oqıtyn mektepterdiń de sanyn azaıtý bolyp tur, – dedi Baqyt Nasyrhanuly.
Jalpy Qajymuqan atyndaǵy jalpy orta mekteptiń negizi 1966 jyly qalanǵan. Mektepte 587 oqýshy jáne mektep aldy daıarlyq tobynda 45 bala tárbıelenedi. Qurylys jumystary aıaqtalyp, paıdalanýǵa berilgen ǵımaratty turǵyzý úshin quny 1,1 mlrd teńge qarjy respýblıkalyq búdjetten jumsalǵan.
Mektepte fızıka, hımıa, ınformatıka kabınetteri, mýltımedıalyq jáne lıngafondyq kabınetter sońǵy úlgidegi tehnologıalarmen jáne kompúterlermen jabdyqtalyp, oqýshylardyń sapaly bilim alýyna barlyq jaǵdaı jasalǵan. Sondaı-aq, túrli sporttyq, óner jáne qolóner t.b. úıirmelerdiń ashylýyna múmkindik týyp otyr.
Aıta keteıik, jańa mekteptiń arqasynda qosymsha taǵy 15 jumys orny ashylǵan.
Maqtaaral aýdany ákiminiń baspasóz qyzmeti
