Maqsatymyz – jalpyulttyq birlikti nyǵaitý
Jalpy, kópultty memleket jaǵdaiyndaǵy biregeilikti saqtaý úshin, jas urpaqty etnomádeni birlestikterdiń qyzmeti salalaryna tartýdyń mańyzy zor. Qazir Almaty oblysyndaǵy Qazaqstan halqy Assambleiasynyń músheleri ómirge qushtar, ózderin qazaqstandyq retinde sezinip, júregi qýanysh pen nurǵa bólengen jastardyń shoǵyry qalyptasqanyn atap aitqym keledi.
Óz basym 2017 jyldan beri Taldyqorǵan qalasyndaǵy «Týǵan til» tatar-mádeni ortalyǵynyń jetekshisimin. Sonymen qatar «Jańǵyrý joly» respýblikalyq jastar qozǵalysy aimaqtyq shtabynyń tóraiymy mindetin abyroimen atqaryp kele jatqanymdy maqtanyshpen aita alamyn. Maǵan Assambleiada jumys istegen unaidy. Búginde etnomádeni ortalyq qyzmetkeri, basshysy degen mamandyqqa daiyndaityn arnaiy oqý orny joq. Bul jumysqa árbir azamat júrek qalaýymen keledi. Men eki birdei mamandyq iesi bola tura, qoǵamdyq negizde jumys isteýge óz erkimmen keldim. Maǵan jastarmen jumys istegen, olardyń boiynda adamgershilik qasietterdi tereń sińirý úshin qaiyrymdylyq sharalar uiymdastyrǵan óte unaidy. Sondai-aq meniń memlekettik tildi erkin bilýim jumys barysynda kóp kómegin tigizedi. Negizi, eki joǵary bilimdi de orys tilinde alǵanmyn. Biraq úide qazaq tilinde sóilesemiz, dos-qurbylarym da qazaqsha sóileidi.
Qyrǵyz halqynyń zańǵar jazýshysy Shyńǵys Aitmatovtyń: «Halyqtyń máńgi ǵumyry – tilinde. Árbir til halqy úshin – uly» degen ulaǵatty sózi bar. Men úshin meniń Otanymnyń tili – uly. Uly tilimizdi kózimizdiń qarashyǵyndai saqtaý bizdiń azamattyq mindetimiz.
Osydan birer jyl buryn jolym túsip, Tatarstanǵa issaparmen bardym. Jolǵa shyǵar aldynda tarihi Otanyma taban tireý qandai áser qaldyrar eken dep tolqyp júrdim. Alaida 10 kún Qazaqstandy saǵynyp, áreń shydadym. Qashan keter-ketkenshe asyqtym. Kún saiyn elmen, úimen, dostarymmen habarlasyp, saǵynyshymdy basýǵa tyrystym. Qaitar kúni ushaqqa kirip kelgenimde stiýardessa qyzdar «Sálemetsiz be» dep amandasqanda, qýanǵanymnan «Sálemetsiz be» dep daýystap jiberippin. Elge oralǵanda kózime jas kelip, jylap jiberdim. Týǵan jerdiń qadirin syrtqa shyqqanda qatty túsinedi ekensiń. Qudaiǵa shúkir, biz baqytty urpaqpyz. Óitkeni soǵys kórgen joqpyz. Bul bizdiń basty jetistigimiz dep bilemin.
«Jańǵyrý joly» respýblikalyq jastar qozǵalysy jumysyna Almaty oblysyndaǵy aýdan, qala jastary belsendi túrde qatysyp keledi. Qozǵalystyń maqsaty – elimizdegi qoǵamdyq kelisim men jalpyulttyq birlikti nyǵaitý jumystarynda jastardy biriktirý. Sonymen qatar «Rýhani jańǵyrý» baǵdarlamasyn júzege asyrýda birlesip jumys isteý, Almaty oblysynyń alys aýdandaryndaǵy jastar qozǵalysymen birigip jumys isteý jáne olardy qozǵalystyń maqsatymen tanystyrý.
Oiǵa alǵan josparymyzdy júzege asyrý úshin barlyǵymyz birlesip eńbek etip, ortaq maqsatty júzege asyrýǵa kúsh salyp kelemiz.
«Jańǵyrý joly» aimaqtyq jastar qozǵalysynyń uiymdastyrýymen Dostyq úiiniń alańynda alǵashqy jiyn ótkizdik. Sonymen qatar Jeńis saiabaǵynda oblys ortalyǵynyń bilimgerleriniń qatysýymen «Taza saiabaq – Taza qala» is-sharasy ótti. Osylaisha, bizdiń qozǵalys Jetisý jerinde jastardyń boiynda ekologiialyq jaýapkershiliktiń erte bastan qalyptasýyna kúsh salǵanymyzdy maqtanyshpen aita alamyn.
Aita ketý kerek, josparymyzdyń kópshiligi adamgershilikke, otansúigishtikke jáne rýhani tárbiege baǵyttalǵan. Osy baǵytta lektsiialar, seminarlar, dóńgelek ústelder, timbildingter, kezdesýlerdi jii uiymdastyramyz.
Almaty oblystyq Qazaqstan halqy Assambleiasynyń josparyna sáikes,«Juldyzy jarqyraǵan – Jetisý» oblystyq forýmyn uiymdastyryp, jastardyń boiyna otanshyldyq qasietti sińirýge tyrystyq.
Forýmǵa Almaty oblystyq Qazaqstan halqy Assambleiasy, Almaty oblystyq QHA músheleri, «Dostyq úii – Qoǵamdyq kelisim ortalyǵynyń» qyzmetkerleri, oblystyq, aýdan-qalalyq Qoǵamdyq kelisim, Analar keńesi, «Ulaǵat» ardagerler keńesi, jetekshi jýrnalister men sarapshylar klýby, ǵylymi-sarapshy top, etnomádeni birlestikter tóraǵalary men belsendileri, stýdenttik Assambleia, bilimgerler, qala turǵyndary jáne BAQ ókilderi belsene qatysqan bolatyn. Osylaisha, bizdiń qozǵalys Almaty oblysyndaǵy ózge de uiymdarmen tize qosyp jumys istep, óńirdegi ultaralyq tatýlyqty nyǵaitýǵa kúsh salýda. Aldaǵy ýaqytta da osy baǵyttaǵy jumystarymyzdy damytyp, Qazaqstannyń ósip-órkendeýine óz úlesimizdi qosatyn bolamyz.
Rýfina ÝSANOVA, Almaty oblystyq «Týǵan til» tatar-mádeni ortalyǵynyń jetekshisi, «Jańǵyrý joly» respýblikalyq jastar qozǵalysy aimaqtyq shtabynyń tóraiymy
