Atalmysh otyrysqa QR Ulttyq sport Qaýymdastyǵynyń prezidenti Islambek Saljanov, respýblikalyq «Kókpar» federatsiiasynyń prezidenti Baýyrjan Isabaev jáne elimizdiń barlyq óńirlerindegi «Kókpar» federatsiiasynyń ókilderi qatysty.
Jiynda respýblikalyq «Kókpar» federatsiiasynyń qurmetti prezidenti tanystyryldy. Federatsiianyń qurmetti prezidenti bolyp tanymal kásipker, qoǵam qairatkeri, QR Parlament Májilisiniń depýtaty Aidarbek Qojanazarov sailandy.
Otyrysta sóz alǵan respýblikalyq «Kókpar» federatsiiasynyń prezidenti Baýyrjan Isabaev kókpar sportynyń qoǵamdaǵy mańyzdylyǵyn aityp, alda josparlanǵan jumystarymen bólisti.
– Kókpar – ol tek qana sport retinde adamnyń fizikalyq bolmysyn shynyqtyryp qana qoimaidy, sonymen qatar, ol – qazaq halqynyń rýhaniiatymen, salt-dástúrimen bite qainasqan sport túri. Osy rette Aidarbek Asanulynyń kókpar sportyna qosatyn úlesi zor dep bilemin. Aldaǵy ýaqytta kókpar sportyn elimizdiń barlyq oblystarynda jáne halyqaralyq arenalarda joǵary deńgeide damytyp kóteretinine shúbá keltirmeimin.
Jiynǵa arnaiy qatysqan QR Ulttyq sport Qaýymdastyǵynyń prezidenti Islambek Saljanov kókpar sportyndaǵy máselelerdi atap, onyń qoǵamdaǵy róline toqtaldy.
– Jalpy, kókpar – qazaqtyń bolmysyna ainalǵan sport túri ekenin barshamyz bilemiz. Kókparsyz qazaqty, al, qazaqty kókparsyz elestetý múmkin emes. Sol sebepten de kókpardyń tóńireginde bolyp jatqan barlyq jańalyqtar men máseleler qoǵam nazarynda turady.
Sońǵy jyldary Memleket basshysy Qasym-Jomart Kemeluly Toqaevtyń qoldaýynyń arqasynda elimizde ulttyq sport damyp, onyń nasihaty kúsheiýde.
Aidarbek Asanuly osy kúnge deiin qoǵamdyq-saiasi qyzmetpen qatar ulttyq sportqa da belsendi qoldaý kórsetip keledi. Onyń ishinde kókpar da bar. Patriotizm men ulttyq dástúrdi jańǵyrtýdy birinshi orynǵa qoiatyn Aidarbek Asanuly aldaǵy ýaqytta «Kókpar» federatsiiasynyń jumysyna tyń serpin bererine senemin.
Aldaǵy ýaqytta da Ulttyq sport túrleri qaýymdastyǵy Respýblikalyq «Kókpar» federatsiiasymen birlese otyryp júieli jumystar júrgizedi.
2024 jyldyń qyrkúiek aiynda Qazaqstanda V Dúniejúzilik Kóshpendiler oiyndary ótedi. Bul óte mártebeli biraq sonymen birge jaýapty mindet. Ony eń joǵarǵy deńgeide atqarýymyz qajet. Bul halyqaralyq is-sharany uiymdastyrý men ótkizý Memleket basshysy Qasym-Jomart Toqaevtyń tikelei baqylýynda, – dep málimdedi Islambek Tóleýbaiuly.
Jiyn sońynda sóz alǵan «Kókpar» federatsiiasynyń qurmetti prezidenti Aidarbek Qojanazarov mártebeli jáne jaýapty jumysqa kiriskenine qýanyshty ekenin jetkizdi.
– Ulttyq sport dese, onyń ishinde kókpar dese ishken asymdy jerge qoiatynymdy barshasy biledi. Negizgi maqsatym – ulttyq sportymyzdy damytý arqyly ultymyzdyń rýhyn kóterý, ultymyzdyń abyroiyn álemge pash etý. Aldaǵy ýaqytta kókpar sportyndaǵy máselelerdi ońtaily sheshýge barlyq kúsh-jigerimdi salatyn bolamyn, – dedi QR Parlament Májilisiniń depýtaty Aidarbek Qojanazarov.
Aita keteiik, búginde Ulttyq sport Qaýymdastyǵynyń quramyna 9 federatsiia kiredi. Olar – Báige, Kókpar, Aýdaryspaq, Teńge ilý, Jamby atý, Asyq atý, Dástúrli sadaq atý, Toǵyzqumalaq jáne Qusbegilik.
Al, ótken jyldyń qyrkúiek aiynan bastap Qaýymdastyq prezidenti bolyp belgili kásipker jáne metsenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov sailanǵan bolatyn.
