Jýrnalist, Májilistiń VIII shaqyrylymynyń burynǵy depýtaty Maqsat Tolyqbai «Mýzart» tobynyń qurmetine eskertkish pen alleia salý týraly usynysyn aitty, dep habarlaidy dalanews.kz.
Onyń aitýynsha, 2000 jyldary kóptegen qazaq jastary Resei men Batys mádenietine eliktei bastaǵan kezeńde «Mýzart» toby ulttyq ónerdi dáriptep, jastardyń qazaqy qundylyqtarǵa bet burýyna yqpal etken.
«Sol kezde ulttyq rýhty qaita oiatqan “Mýzart” toby shyqty. Olar kóptegen jastyń betin beri buryp, ulttyq qundylyqtarǵa qaita oralýyna sebep boldy. Keiin olardyń jolyn jalǵaǵan birneshe top paida boldy. Shyn máninde, “Mýzart” qazaq estradasyna revoliýtsiia jasaǵan ujym», – dedi Maqsat Tolyqbai.
Ol «Mýzarttyń» qazaq mádenietindegi eńbegi tarihi mańyzǵa ie bolǵanymen, kópshilik bul eńbekti jii eskere bermeitinin aitty.
Sondyqtan kásipkerlerge toptyń qurmetine arnaiy alleia ashýdy usynyp júrgenin jetkizdi. Sondai-aq Sáken Maiǵazievtiń inisi Maqat esimdi azamatpen osy máseleni talqylaǵanyn aityp, onyń bolashaqta salynatyn turǵyn úi keshenine «Mýzart» ataýyn berý nieti bar ekenin jetkizdi.
Maqsat Tolyqbaidyń pikirinshe, Kóktóbedegi álemge áigili juldyzdardyń «Dańq alleiasy» sekildi, qazaq jastarynyń dúnietanymyna áser etken «Mýzart» tobynyń da músini men estelik orny bolýy tiis.
Ol qazirgi ýaqytta osy bastamany júzege asyrý baǵytynda jumystar júrgizilip jatqanyn da atap ótti.
Jiynǵa qatysýshylar burynǵy depýtattyń usynysyn qoldap, oń baǵasyn bergen.
