Búgin Parlament Májilisinde «Ataýly áleýmettik kómek salasyndaǵy memlekettik saiasatty iske asyrýdyń tiimdiligi» taqyrybynda Úkimet saǵaty ótip, Eńbek jáne halyqty áleýmettik qorǵaý ministri Birjan Nurymbetov AÁK berýdiń jańa tetikteri týraly baiandama jasady, dep habarlaidy Dalanews.kz Ult portalyna siltep.
Ministrdiń sózinshe, 2020 jyldyń 1 qańtardan bastap kámeletke tolmaǵan 4 jáne odan da kóp balasy bar otbasylarǵa járdemaqy taǵaiyndalǵanda, otbasynyń tabysyna qaramaidy.
4 balaǵa - 42 496 teńge; 5 balaǵa - 53127 teńge; 6 balaǵa - 63 757 teńge; 7 jáne odan kóp balaǵa 74 388 teńge beriledi.
«Kópbalaly otbasylarǵa jeke memlekettik járdemaqy engizý kózdelgen. 2020 jyldan bastap kópbalaly otbasylarǵa, iaǵni 4 jáne odan da kóp kámeletke tolmaǵan balalary bar januialarǵa otbasynyń tabysyna qaramastan járdemaqy tóleý kózdelip otyr.
Bizdiń esebimiz boiynsha, atalǵan járdemaqyny jańa jyldan bastap 340 myńnan astam kópbalaly otbasy alatyn bolady.
Jańa talaptar boiynsha eger de ataýly áleýmettik kómek alyp júrgen otbasynyń eńbekke jaramdy múshesi áleýmettik shartqa qol qoiyp, keiin jumystan bas tartsa, áleýmettik kómek sol januianyń barlyq múshesine toqtatylady», - dedi ministr Parlament Májilisindegi Úkimet saǵatynda.
Sonymen qatar jańa jyldan bastap «kepildendirilgen áleýmettik toptama» berile bastaidy.
1 jastan 6 jasqa deiingi tabysy az otbasy balalaryna azyq-túlik jáne gigiena quraldary, 6 jastan 18 jasqa deiingi balalarǵa mektepterde ystyq tamaq berilip, oqý quraldarymen jáne mektep kiimmen qamtamasyz etiledi, mektepke deiingi jol shyǵyndary óteledi.
Meditsinalyq, stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde kórsetiledi.
"Biz kóp oilandyq. Kepildendirilgen paket balanyń mektepte oqyp júrgen merzimine deiin taǵaiyndalady. Sondyqan eger de otbasynyń eńbekke jaramdy múshesi jumystan bas tartsa, ataýly áleýmettik kómek toqtatylady. Biraq balalaryna kepildendirigen áleýmettik paket berile beredi", - dep naqtylady vedomstvo basshysy.
Nurymbetov jumystan bas tartqany úshin ataýly áleýmettik kómekti búkil januiaǵa toqtatý týraly jańa norma ne úshin engizilgenin túsindirdi.
"Osy eki aida men on bes óńirdi aralap shyqtym. Halyqpen kezdeskende bir kisiler ataýly áleýmettik kómek surap jatsa, endi biri "sizderdiń ataýly áleýmettik kómekterińizdiń arqasynda jumysqa adam tappaimyn" dep shaǵymdanady.
Bir joly bir sharýa aitady: meniń 150 siyrym bar, saýynshy qyz balalardy tartamyn, 80-100 myń teńge tólegim keledi, sútten 20 protsentin bergiń keledi. Biraq ol kisiler jumysqa kelmeidi" deidi. Sebebi jumysqa barmasa, ataýly áleýmettik kómek ózine ǵana toqtatylady da, otbasynyń qalǵan músheleri, balalary ala beredi", - deidi ministr.
Sondyqtan eńbek ministrligi masyldyqqa jol bermes úshin jaýapkershilikti arttyrýdy kózdep otyr.
2020 jylǵy 1 qańtardan bastap ataýly áleýmettik kómektiń biraz tetigi ózgeriske ushyraidy:
- birinshiden, ataýly áleýmettik kómek endi toqsan saiyn, shartty jáne shartsyz kómek úsh aiǵa taǵaiyndalady;
- ekinshiden, AÁK mólsheri januianyń barlyq múshesi úshin kedeilik shegi men jan basyna shaqqandaǵy ortasha tabys arasyndaǵy aiyrmashylyq retinde belgilenedi;
- úshinshiden, jumystan bas tartqan jaǵdaida áleýmettik kómek alý sharttary kúsheitiledi. Eger otbasynyń eńbekke qabiletti múshesi usynylǵan jumyspen qamtý sharalarynan bas tartsa, onda ol jáne onyń januiasynyń barlyq múshesi AÁK alý quqyǵynan aiyrylady.
- tórtinshiden, ýchaskelik komissiia institýty kúsheitiledi. Zań jobasynda ýchaskelik komissiialar úshin otbasynyń ataýly áleýmettik kómekke muqtajdyǵyn anyqtaý kriteriilerin bekitý úshin ortalyq atqarýshy organnyń quzyreti kózdelgen. Januianyń materialdyq jaǵdaiyna tekserý júrgizý jáne qorytyndy jasaý úshin ýchaskelik komissiialardyń merzimi úsh kúnnen jeti kúnge deiin ulǵaityldy;
Qyrkúiektiń 2-si kúni jariialanǵan Qazaqstan halqyna Joldaýynda Prezident Qasym-Jomart Toqaev turmysy tómen otbasylarǵa arnalǵan ataýly áleýmettik kómekti «azamattardy eńbekke yntalandyratyn, ashyq, ádil jolmen berýdi» usyndy.
Bir aidan soń Eńbek jáne halyqty áleýmettik qorǵaý ministri Birjan Nurymbetov Úkimette ataýly áleýmettik kómektiń "jańartylǵan" jobasyn tanystyrǵan bolatyn.
