بۇگىن پارلامەنت ماجىلىسىندە «اتاۋلى الەۋمەتتىك كومەك سالاسىنداعى مەملەكەتتىك ساياساتتى ىسكە اسىرۋدىڭ تيىمدىلىگى» تاقىرىبىندا ۇكىمەت ساعاتى ءوتىپ، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ااك بەرۋدىڭ جاڭا تەتىكتەرى تۋرالى بايانداما جاسادى، دەپ حابارلايدى Dalanews.kz ۇلت پورتالىنا سىلتەپ.
ءمينيستردىڭ سوزىنشە، 2020 جىلدىڭ 1 قاڭتاردان باستاپ كامەلەتكە تولماعان 4 جانە ودان دا كوپ بالاسى بار وتباسىلارعا جاردەماقى تاعايىندالعاندا، وتباسىنىڭ تابىسىنا قارامايدى.
4 بالاعا - 42 496 تەڭگە؛ 5 بالاعا - 53127 تەڭگە؛ 6 بالاعا - 63 757 تەڭگە؛ 7 جانە ودان كوپ بالاعا 74 388 تەڭگە بەرىلەدى.
«كوپبالالى وتباسىلارعا جەكە مەملەكەتتىك جاردەماقى ەنگىزۋ كوزدەلگەن. 2020 جىلدان باستاپ كوپبالالى وتباسىلارعا، ياعني 4 جانە ودان دا كوپ كامەلەتكە تولماعان بالالارى بار جانۇيالارعا وتباسىنىڭ تابىسىنا قاراماستان جاردەماقى تولەۋ كوزدەلىپ وتىر.
ءبىزدىڭ ەسەبىمىز بويىنشا، اتالعان جاردەماقىنى جاڭا جىلدان باستاپ 340 مىڭنان استام كوپبالالى وتباسى الاتىن بولادى.
جاڭا تالاپتار بويىنشا ەگەر دە اتاۋلى الەۋمەتتىك كومەك الىپ جۇرگەن وتباسىنىڭ ەڭبەككە جارامدى مۇشەسى الەۋمەتتىك شارتقا قول قويىپ، كەيىن جۇمىستان باس تارتسا، الەۋمەتتىك كومەك سول جانۇيانىڭ بارلىق مۇشەسىنە توقتاتىلادى»، - دەدى مينيستر پارلامەنت ماجىلىسىندەگى ۇكىمەت ساعاتىندا.
سونىمەن قاتار جاڭا جىلدان باستاپ «كەپىلدەندىرىلگەن الەۋمەتتىك توپتاما» بەرىلە باستايدى.
1 جاستان 6 جاسقا دەيىنگى تابىسى از وتباسى بالالارىنا ازىق-تۇلىك جانە گيگيەنا قۇرالدارى، 6 جاستان 18 جاسقا دەيىنگى بالالارعا مەكتەپتەردە ىستىق تاماق بەرىلىپ، وقۋ قۇرالدارىمەن جانە مەكتەپ كيىممەن قامتاماسىز ەتىلەدى، مەكتەپكە دەيىنگى جول شىعىندارى وتەلەدى.
مەديسينالىق، ستوماتولوگيالىق كومەك 18 جاسقا دەيىنگى بالالارعا تەگىن مەديسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديسينالىق ساقتاندىرۋ شەڭبەرىندە كورسەتىلەدى.
"ءبىز كوپ ويلاندىق. كەپىلدەندىرىلگەن پاكەت بالانىڭ مەكتەپتە وقىپ جۇرگەن مەرزىمىنە دەيىن تاعايىندالادى. سوندىقان ەگەر دە وتباسىنىڭ ەڭبەككە جارامدى مۇشەسى جۇمىستان باس تارتسا، اتاۋلى الەۋمەتتىك كومەك توقتاتىلادى. ءبىراق بالالارىنا كەپىلدەندىرىگەن الەۋمەتتىك پاكەت بەرىلە بەرەدى"، - دەپ ناقتىلادى ۆەدومستۆو باسشىسى.
نۇرىمبەتوۆ جۇمىستان باس تارتقانى ءۇشىن اتاۋلى الەۋمەتتىك كومەكتى بۇكىل جانۇياعا توقتاتۋ تۋرالى جاڭا نورما نە ءۇشىن ەنگىزىلگەنىن ءتۇسىندىردى.
"وسى ەكى ايدا مەن ون بەس ءوڭىردى ارالاپ شىقتىم. حالىقپەن كەزدەسكەندە ءبىر كىسىلەر اتاۋلى الەۋمەتتىك كومەك سۇراپ جاتسا، ەندى ءبىرى "سىزدەردىڭ اتاۋلى الەۋمەتتىك كومەكتەرىڭىزدىڭ ارقاسىندا جۇمىسقا ادام تاپپايمىن" دەپ شاعىمدانادى.
ءبىر جولى ءبىر شارۋا ايتادى: مەنىڭ 150 سيىرىم بار، ساۋىنشى قىز بالالاردى تارتامىن، 80-100 مىڭ تەڭگە تولەگىم كەلەدى، سۇتتەن 20 پروسەنتىن بەرگىڭ كەلەدى. ءبىراق ول كىسىلەر جۇمىسقا كەلمەيدى" دەيدى. سەبەبى جۇمىسقا بارماسا، اتاۋلى الەۋمەتتىك كومەك وزىنە عانا توقتاتىلادى دا، وتباسىنىڭ قالعان مۇشەلەرى، بالالارى الا بەرەدى"، - دەيدى مينيستر.
سوندىقتان ەڭبەك مينيسترلىگى ماسىلدىققا جول بەرمەس ءۇشىن جاۋاپكەرشىلىكتى ارتتىرۋدى كوزدەپ وتىر.
2020 جىلعى 1 قاڭتاردان باستاپ اتاۋلى الەۋمەتتىك كومەكتىڭ ءبىراز تەتىگى وزگەرىسكە ۇشىرايدى:
- بىرىنشىدەن، اتاۋلى الەۋمەتتىك كومەك ەندى توقسان سايىن، شارتتى جانە شارتسىز كومەك ءۇش ايعا تاعايىندالادى؛
- ەكىنشىدەن، ااك مولشەرى جانۇيانىڭ بارلىق مۇشەسى ءۇشىن كەدەيلىك شەگى مەن جان باسىنا شاققانداعى ورتاشا تابىس اراسىنداعى ايىرماشىلىق رەتىندە بەلگىلەنەدى؛
- ۇشىنشىدەن، جۇمىستان باس تارتقان جاعدايدا الەۋمەتتىك كومەك الۋ شارتتارى كۇشەيتىلەدى. ەگەر وتباسىنىڭ ەڭبەككە قابىلەتتى مۇشەسى ۇسىنىلعان جۇمىسپەن قامتۋ شارالارىنان باس تارتسا، وندا ول جانە ونىڭ جانۇياسىنىڭ بارلىق مۇشەسى ااك الۋ قۇقىعىنان ايىرىلادى.
- تورتىنشىدەن، ۋچاسكەلىك كوميسسيا ينستيتۋتى كۇشەيتىلەدى. زاڭ جوباسىندا ۋچاسكەلىك كوميسسيالار ءۇشىن وتباسىنىڭ اتاۋلى الەۋمەتتىك كومەككە مۇقتاجدىعىن انىقتاۋ كريتەرييلەرىن بەكىتۋ ءۇشىن ورتالىق اتقارۋشى ورگاننىڭ قۇزىرەتى كوزدەلگەن. جانۇيانىڭ ماتەريالدىق جاعدايىنا تەكسەرۋ جۇرگىزۋ جانە قورىتىندى جاساۋ ءۇشىن ۋچاسكەلىك كوميسسيالاردىڭ مەرزىمى ءۇش كۇننەن جەتى كۇنگە دەيىن ۇلعايتىلدى؛
قىركۇيەكتىڭ 2ء-سى كۇنى جاريالانعان قازاقستان حالقىنا جولداۋىندا پرەزيدەنت قاسىم-جومارت توقايەۆ تۇرمىسى تومەن وتباسىلارعا ارنالعان اتاۋلى الەۋمەتتىك كومەكتى «ازاماتتاردى ەڭبەككە ىنتالاندىراتىن، اشىق، ءادىل جولمەن بەرۋدى» ۇسىندى.
ءبىر ايدان سوڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ۇكىمەتتە اتاۋلى الەۋمەتتىك كومەكتىڭ "جاڭارتىلعان" جوباسىن تانىستىرعان بولاتىن.
