Qýandyq Bishimbaevtyń burynǵy áieli Nazym Qaharman sot otyrysyna qatysty pikir bildirdi, - dep habarlaidy Dalanews.kz
Kúni keshe sot otyrysynda Bishimbaev Saltanat pen balalaryn alyp shetelge demalýǵa shyǵar kezde bolǵan jait týraly aityp bergen bolatyn. Qýandyq Bishimbaevtyń sózinshe, Saltanat shetelge shyǵar aldyndaǵy túnde sheteldik tólqujatyn joǵaltyp alǵan.
Osyǵan bailanysty Nazym Saltanatpen ne jaily sóileskenin kórsetken. Saltanat bul jaitqa qatysty Nazymnan birden keshirim suraǵan.
«Tólqujatymdy joǵaltyp alǵanym úshin keshirim suraimyn, úide kóship, arasynda streske túsip, bári qabattasyp ketti. Balalardyń maǵan kózqarasy jaqsy, ol sizdiń arqańyzda. Óte meiirimdi jáne tárbieli balalar. Bul sizdiń arqańyz dep bilemin jáne sizge qurmetpen qaraimyn. Eger qarsy bolmasańyz sizben tanyssam dep edim. Qarym-qatynasymyz jaqsy bolǵanyn qalaimyn», - dep jazǵan Saltanat.
Sondai-aq Nazym Qaharman «Qýandyq Bishimbaev manipýliator» degen pikirmen kelisken.
«Kelisemin, masterpiece, manipýliator», - deidi Nazym.
Sonymen qatar, Nazym Qaharman qyzynyń Saltanatqa jaqyn kúnderi jazǵan hatyn kórsetken. 21 naýryzda jazylǵan hatta Nazymnyń qyzy Saltanatqa ony qatty saǵynǵanyn jazǵan.
«Qatty saǵyndym, ákem jaman adam, áielderdi urý sumdyq jáne uiat nárse. Sizdi jaqsy kóremin», - dep jazǵan Bishimbaev pen Nazymnyń qyzy.
Aita keteiik, Nazym Qaharman Qýandyq Bishimbaevpen 14 jyl nekede bolǵan. Olar 2020 jyly ajyrasyp ketken. Nazym Qaharman men Qýandyq Bishimbaevtyń úsh balasy bar.
1 sáýirde ótken sot otyrysynda Qýandyq Bishimbaev Saltanat Núkenovamen qarym-qatynasy týraly óz nusqasyn aitqan bolatyn. Sonymen qatar, Bishimbaev sotta Saltanattyń jeke ómirindegi burynǵy jaittar týraly da aitty.
Odan bólek, Bishimbaev iske qatysty aqparattar burmalanǵanyn málimdedi.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
