قۋاندىق بيشىمبايەۆتىڭ بۇرىنعى ايەلى نازىم قاحارمان سوت وتىرىسىنا قاتىستى پىكىر ءبىلدىردى، - دەپ حابارلايدى Dalanews.kz
كۇنى كەشە سوت وتىرىسىندا بيشىمبايەۆ سالتانات پەن بالالارىن الىپ شەتەلگە دەمالۋعا شىعار كەزدە بولعان جايت تۋرالى ايتىپ بەرگەن بولاتىن. قۋاندىق بيشىمبايەۆتىڭ سوزىنشە، سالتانات شەتەلگە شىعار الدىنداعى تۇندە شەتەلدىك ءتولقۇجاتىن جوعالتىپ العان.
وسىعان بايلانىستى نازىم سالتاناتپەن نە جايلى سويلەسكەنىن كورسەتكەن. سالتانات بۇل جايتقا قاتىستى نازىمنان بىردەن كەشىرىم سۇراعان.
«ءتولقۇجاتىمدى جوعالتىپ العانىم ءۇشىن كەشىرىم سۇرايمىن، ۇيدە كوشىپ، اراسىندا سترەسكە ءتۇسىپ، ءبارى قاباتتاسىپ كەتتى. بالالاردىڭ ماعان كوزقاراسى جاقسى، ول ءسىزدىڭ ارقاڭىزدا. وتە مەيىرىمدى جانە تاربيەلى بالالار. بۇل ءسىزدىڭ ارقاڭىز دەپ بىلەمىن جانە سىزگە قۇرمەتپەن قارايمىن. ەگەر قارسى بولماساڭىز سىزبەن تانىسسام دەپ ەدىم. قارىم-قاتىناسىمىز جاقسى بولعانىن قالايمىن»، - دەپ جازعان سالتانات.
سونداي-اق نازىم قاحارمان «قۋاندىق بيشىمبايەۆ مانيپۋلياتور» دەگەن پىكىرمەن كەلىسكەن.
«كەلىسەمىن، masterpiece، مانيپۋلياتور»، - دەيدى نازىم.
سونىمەن قاتار، نازىم قاحارمان قىزىنىڭ سالتاناتقا جاقىن كۇندەرى جازعان حاتىن كورسەتكەن. 21 ناۋرىزدا جازىلعان حاتتا نازىمنىڭ قىزى سالتاناتقا ونى قاتتى ساعىنعانىن جازعان.
«قاتتى ساعىندىم، اكەم جامان ادام، ايەلدەردى ۇرۋ سۇمدىق جانە ۇيات نارسە. ءسىزدى جاقسى كورەمىن»، - دەپ جازعان بيشىمبايەۆ پەن نازىمنىڭ قىزى.
ايتا كەتەيىك، نازىم قاحارمان قۋاندىق بيشىمبايەۆپەن 14 جىل نەكەدە بولعان. ولار 2020 جىلى اجىراسىپ كەتكەن. نازىم قاحارمان مەن قۋاندىق بيشىمبايەۆتىڭ ءۇش بالاسى بار.
1 ساۋىردە وتكەن سوت وتىرىسىندا قۋاندىق بيشىمبايەۆ سالتانات نۇكەنوۆامەن قارىم-قاتىناسى تۋرالى ءوز نۇسقاسىن ايتقان بولاتىن. سونىمەن قاتار، بيشىمبايەۆ سوتتا سالتاناتتىڭ جەكە ومىرىندەگى بۇرىنعى جايتتار تۋرالى دا ايتتى.
ودان بولەك، بيشىمبايەۆ ىسكە قاتىستى اقپاراتتار بۇرمالانعانىن مالىمدەدى.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
كەيىن قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى.
بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
