Mańǵystaý oblysynda sarbazdardy tósekte jatqan jerinen judyryqpen uryp jibergen serjant jazadan sytylyp ketti, - dep habarlaidy Dalanews.kz Diapazonǵa siltep.
Aiyptaý aktine sáikes serjant sarbazdar jatqan bólmege kirip, úsheýin judyryqpen basynan uryp jibergen. Oǵan sarbazdardyń biri kazarma dálizinde ruqsatsyz júrgeni sebep bolypty-mys.
Taǵy bir jaǵdaida serjant sarbazdardyń "nasybai" qoldanyp otyrǵanyn baiqap, úsheýin betinen salyp, taǵy ekeýiniń basynan urǵan.
Serjant "Qyzmet babyn asyra paidalaný" baby boiynsha sotqa tartyldy. Ol bar kinásin moiyndaǵanymen soqqy jegen sarbazdardyń arqasynda jazadan qutylyp ketken. Alty sarbaz serjantqa eshqandai narazylyǵy joǵyn aityp, ony eki jaqtyń tatýlasýyna bailanysty qylmystyq jaýapkershilikten bosatýdy surady.
Sot olardyń ótinishin qanaǵattandyrǵan: 27 jastaǵy serjant jazadan qutylyp ketti.
Aita keteiik, elimizde sarbazdardyń álimjettik kórip, taiaq jeýi jiilegen. Mysaly áskerde júrip, qatty jaraqat alǵan sarbaz Erbaian Muhtardyń jaǵdaiy qazaqstandyqtarǵa málim.
Áskerde júrgende bas-mi jaraqatyn alyp, komaǵa túsken Erbaian Muhtardy jaqyndary emdetý úshin Túrkiiaǵa alyp ketti. Bul týraly otbasynyń qorǵaýshysy Inga Imanbai málimdedi.
"Erbaian Ystambulǵa jolǵa shyqty. Ushaq búgin tańǵy segizde Astanadan ushty. Bul kúnge jetý de ońaiǵa soqqan joq. Toqtaýsyz kúres, talmai eńbekpen keldi. Bastysy - keńpeiil halqymyzdyń meiirimi men janashyrlyǵynyń jemisi. Erbaian, myqty bol! Bul jartylai jeńis! Buiyrsa, úlken jeńister alda. Seniń bar ómiriń alda. Aman-esen elge óz aiaǵyńmen oralýyńdy kútemiz”, - dedi ol.
Buǵan deiin qazaqstandyqtar áskerde múgedek bolyp qalǵan sarbaz Erbaian Muhtarǵa 140 mln jinap bergen edi. Bul týraly Erbaiannyń jaqyndary sarbazǵa ashylǵan paraqshada habarlady.
Erbaian byltyr jeltoqsan aiynda komaǵa tústi.
