Mańǵystaýda óńirdiń eńbek naryǵyna sai «Jańa mamandyqtar atlasy» ázirlenedi.
Atlas munai-gaz, aqparattyq tehnologiialar, bilim berý, týrizm, kólik jáne logistika baǵyttary boiynsha oryndalady.
Joba aiasynda oblysta qandai mamandyqtar suranysqa ie ekenin anyqtaý úshin taldaý júrgizildi. Aldaǵy ýaqytta 8-11-synyp oqýshylary arasynda kásiptik baǵdar berý jumystary júrgiziledi.
– Jańa mamandyqtar atlasynyń kómegimen eńbek naryǵynyń qajettiligin boljaýǵa bolady. Ýaqyt óte kele keibir mamandyqtar joiylyp, jańa mamandyqtar paida bolady. Máselen, oblysymyzda týrizm qarqyndy damyp keledi. Tiisinshe, bizge óńirdiń týristik áleýetin arttyrýdy biletin mamandar qajet.
Mysaly, brend menedjeri. Bul brendtiń ishki protsesteri men syrtqy kommýnikatsiialaryn bilip, barlyq marketingtik aqparatqa ielik etetin adam.
Baǵdarlamanyń tujyrymdamasy 2023 jyldyń naýryz aiynda bekitiledi dep josparlanyp otyr. Kadrlar qyrkúiek aiynda oqytylady, - dedi Sh.Esenov atyndaǵy Kaspii tehnologiialar jáne injiniring ýniversitetiniń rektory Berik Ahmetov.
Mańǵystaý oblysynyń ákimi Nurlan Noǵaev tek qaladaǵy ǵana emes, aýyl mektepteriniń túlekteri de jańa mamandyqty meńgerýi kerek ekenin atap ótti.
– Eńbek naryǵynda bilikti mamandar tapshylyǵy bolmas úshin kadr daiarlaýǵa úlken kóńil bólý kerek. Ol úshin qalada ǵana emes, aýyl mektepterinde de bilim sapasyn arttyrýdy jandandyrý qajet. Óńirimizdiń damýyna úles qosatyn básekege qabiletti jastardy tárbieleýimiz qajet, – dedi Nurlan Noǵaev.
