ماڭعىستاۋدا ءوڭىردىڭ ەڭبەك نارىعىنا ساي «جاڭا ماماندىقتار اتلاسى» ازىرلەنەدى.
اتلاس مۇناي-گاز، اقپاراتتىق تەحنولوگيالار، ءبىلىم بەرۋ، تۋريزم، كولىك جانە لوگيستيكا باعىتتارى بويىنشا ورىندالادى.
جوبا اياسىندا وبلىستا قانداي ماماندىقتار سۇرانىسقا يە ەكەنىن انىقتاۋ ءۇشىن تالداۋ جۇرگىزىلدى. الداعى ۋاقىتتا 8-11-سىنىپ وقۋشىلارى اراسىندا كاسىپتىك باعدار بەرۋ جۇمىستارى جۇرگىزىلەدى.
– جاڭا ماماندىقتار اتلاسىنىڭ كومەگىمەن ەڭبەك نارىعىنىڭ قاجەتتىلىگىن بولجاۋعا بولادى. ۋاقىت وتە كەلە كەيبىر ماماندىقتار جويىلىپ، جاڭا ماماندىقتار پايدا بولادى. ماسەلەن، وبلىسىمىزدا تۋريزم قارقىندى دامىپ كەلەدى. تيىسىنشە، بىزگە ءوڭىردىڭ تۋريستىك الەۋەتىن ارتتىرۋدى بىلەتىن ماماندار قاجەت.
مىسالى، برەند مەنەدجەرى. بۇل برەندتىڭ ىشكى پروسەستەرى مەن سىرتقى كوممۋنيكاسيالارىن ءبىلىپ، بارلىق ماركەتينگتىك اقپاراتقا يەلىك ەتەتىن ادام.
باعدارلامانىڭ تۇجىرىمداماسى 2023 جىلدىڭ ناۋرىز ايىندا بەكىتىلەدى دەپ جوسپارلانىپ وتىر. كادرلار قىركۇيەك ايىندا وقىتىلادى، - دەدى ش.ەسەنوۆ اتىنداعى كاسپيي تەحنولوگيالار جانە ينجينيرينگ ۋنيۆەرسيتەتىنىڭ رەكتورى بەرىك احمەتوۆ.
ماڭعىستاۋ وبلىسىنىڭ اكىمى نۇرلان نوعايەۆ تەك قالاداعى عانا ەمەس، اۋىل مەكتەپتەرىنىڭ تۇلەكتەرى دە جاڭا ماماندىقتى مەڭگەرۋى كەرەك ەكەنىن اتاپ ءوتتى.
– ەڭبەك نارىعىندا بىلىكتى ماماندار تاپشىلىعى بولماس ءۇشىن كادر دايارلاۋعا ۇلكەن كوڭىل ءبولۋ كەرەك. ول ءۇشىن قالادا عانا ەمەس، اۋىل مەكتەپتەرىندە دە ءبىلىم ساپاسىن ارتتىرۋدى جانداندىرۋ قاجەت. ءوڭىرىمىزدىڭ دامۋىنا ۇلەس قوساتىن باسەكەگە قابىلەتتى جاستاردى تاربيەلەۋىمىز قاجەت، – دەدى نۇرلان نوعايەۆ.
