Mańǵystaý oblysy Munaily aýdany Basqudyq aýylynda ornalasqan jeke menshik balabaqshalardyń birinde tárbieshi bir jasar búldirshindi uqypsyz kóterip, qolyn shyǵaryp alǵan, dep habarlaidy Dalanews.kz.
Oqiǵadan keiin alǵashqy meditsinalyq kómek kórsetilmegen. Al ata-anasy balasynyń jaraqat alǵanyn tek úige kelgen soń ańǵarǵan.
Beinebaqylaý jazbalarynan tárbieshiniń qyzdy tynysh otyrǵan jerinen julqylap, oryndyqqa otyrǵyzǵany kórinedi. Alaida bala sol sátte jylamaǵan. Tek keshkisin úiinde qolynyń aýyratynyn aityp, ata-anasyna shaǵymdanǵan.
Buǵan qosa, beinejazbany saraptaý barysynda tárbieshiniń gigienalyq talaptardy óreskel buzǵany anyqtaldy. Ol bir qasyqpen birneshe balaǵa sorpa bergen, iaǵni ashana tazalyǵy saqtalmaǵan. Osy olqylyqtardan keiin tárbieshiniń kómekshisi de jumystan shettetildi.
Al balabaqsha basshysynyń aitýynsha, bul kezdeisoq bolǵan jait.
“Videoda tárbieshiniń tek balany kóterip, ornyna otyrǵyzǵany ǵana kórinedi. Quzyrly organdar da kadrlardy qarap shyqty, munda qasaqana zorlyq-zombylyq joq. Al tamaq berý máselesine kelsek, qyzmetker ydys-aiaqty jýýdy jeńildetý úshin osylai jasaǵan", - deidi Raýshan Aiapbergenova.
