Aýyl sharýashylyǵy salasy el ekonomıkasynyń negizgi salalarynyń biri bolyp tabylady. Aǵymdaǵy jyly aýyl sharýashylyǵynyń shaǵyn jáne orta bıznestegi kásipkerlerin, sharýa qojalyqtaryn qoldaý maqsatynda búdjetten sýbsıdıalaýǵa 1,9 mlrd teńge bólindi.
Atap aıtqanda, mal sharýashylyǵyn damytýǵa – 818 mln teńge, eginshilikti damytýǵa - 43,6 mln teńge, ınvestısıalyq sýbsıdıalaýǵa – 720,4 mln teńge, syıaqy mólsherlemelerin sýbsıdıalaýǵa – 350 mln teńge. Mal sharýashylyǵy salasyn sýbsıdıalaýǵa 2021 jyly 127 mln teńgeni bólinse, 2023 jyly bul qarajat 818 mln teńgege deıin ulǵaıǵan.
Jalpy, óńirdiń aýyl sharýashylyǵy salasyn damytý úshin 2019-2021 jyldary agroónerkásiptik keshenniń 1005 sýbektisine 2,33 mlrd teńge kóleminde sýbsıdıa bólingen. 2022 jyly – 2,2 mlrd teńgege 661 agroónerkásiptik keshen sýbsıdıalanǵan.
– Mańǵystaý oblysynda aýyl sharýashylyǵyn damytý maqsatynda biz «Aýyl amanaty» dep atalatyn aýyl azamattaryna nesıe berý jobasyn iske asyramyz. Joba sheńberinde jyldyq 2,5%-ben 5-7 jyl merzimge shaǵyn nesıeler beriledi. Jalpy somasy 1,2 mlrd teńgege 250 jobany iske asyrý josparlanýda. Joba aýyl turǵyndarynyń ál-aýqatyn arttyrýǵa jáne olardyń máselelerin jedel sheshýge múmkindik beredi degen úmittemin, – dedi Nurlan Noǵaev.
