Mańǵystaý oblysynda dala aýmaǵy plastik qaldyqtarymen lastanǵany túsirilgen video áleýmettik jelide qyzý talqylandy, dep habarlaidy Dala News.
Kadrlardy bloger Azamat Sársenbaev jariialaǵan. Videoda óndiristik aimaq fonynda álsiregen túie qoqysqa toly dala arqyly júrip bara jatqanyn kórýge bolady.
Jeli qoldanýshylary kadrlardyń shynaiylyǵyna kúmán keltirip, bul jasandy intellekt kómegimen jasalǵan bolýy múmkin degen boljam aitqan. Alaida video avtory túsirilimniń ras ekenin rastaǵan.
Blogerdiń aitýynsha, video 21 sáýir kúni tańerteń túsirilgen. Al bir kún buryn qoqys poligonynda órt bolǵan. Sol órtten keiin jel arqyly plastik qaldyqtar dalaǵa tarap ketken.
Túsirilim orny Aqtaý qalasynan shamamen 20 shaqyrym jerdegi Baiandy aýyly mańynda ornalasqan.
Oblystyq tabiǵi resýrstar jáne tabiǵat paidalanýdy retteý basqarmasynyń málimetinshe, jaǵdaiǵa dál osy poligondaǵy órt sebep bolǵan. Órtti sóndirý kezinde jáne qatty jeldiń áserinen jeńil qaldyqtar, sonyń ishinde plastik, qaǵaz jáne plenka poligonnan tys jerlerge ushyp ketken.
Vedomstvo ókilderi 18 sáýirde bul aýmaqta senbilik uiymdastyrylyp, tazalaý jumystary júrgizilgenin habarlady.
«Jumystar kúsheitilgen rejimde júrgizilip jatyr. Qysqa merzimde tolyq aiaqtaý josparlanýda. Qorytyndysy boiynsha qosymsha fotoesep usynylady. Jaǵdai turaqty baqylaýda», – dep málimdedi basqarma.
Ákimdik bul jaǵdai ýaqytsha ekenin jáne baqylaýsyzdyqqa bailanysty emes ekenin atap ótti.
Aita keteiik, buǵan deiin 2025 jyly osy óńirdegi jaýapty kompaniialardyń biri ekologiialyq talaptardy buzǵany úshin 3,6 mln teńgege aiyppul arqalaǵan.
