ماڭعىستاۋ وبلىسىندا دالا اۋماعى پلاستيك قالدىقتارىمەن لاستانعانى تۇسىرىلگەن ۆيدەو الەۋمەتتىك جەلىدە قىزۋ تالقىلاندى، دەپ حابارلايدى Dala News.

كادرلاردى بلوگەر ازامات سارسەنبايەۆ جاريالاعان. ۆيدەودا وندىرىستىك ايماق فونىندا السىرەگەن تۇيە قوقىسقا تولى دالا ارقىلى ءجۇرىپ بارا جاتقانىن كورۋگە بولادى.

جەلى قولدانۋشىلارى كادرلاردىڭ شىنايىلىعىنا كۇمان كەلتىرىپ، بۇل جاساندى ينتەللەكت كومەگىمەن جاسالعان بولۋى مۇمكىن دەگەن بولجام ايتقان. الايدا ۆيدەو اۆتورى ءتۇسىرىلىمنىڭ راس ەكەنىن راستاعان.

بلوگەردىڭ ايتۋىنشا، ۆيدەو 21 ءساۋىر كۇنى تاڭەرتەڭ تۇسىرىلگەن. ال ءبىر كۇن بۇرىن قوقىس پوليگونىندا ءورت بولعان. سول ورتتەن كەيىن جەل ارقىلى پلاستيك قالدىقتار دالاعا تاراپ كەتكەن.

ءتۇسىرىلىم ورنى اقتاۋ قالاسىنان شامامەن 20 شاقىرىم جەردەگى باياندى اۋىلى ماڭىندا ورنالاسقان.

وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ مالىمەتىنشە، جاعدايعا ءدال وسى پوليگونداعى ءورت سەبەپ بولعان. ءورتتى ءسوندىرۋ كەزىندە جانە قاتتى جەلدىڭ اسەرىنەن جەڭىل قالدىقتار، سونىڭ ىشىندە پلاستيك، قاعاز جانە پلەنكا پوليگوننان تىس جەرلەرگە ۇشىپ كەتكەن.

ۆەدومستۆو وكىلدەرى 18 ساۋىردە بۇل اۋماقتا سەنبىلىك ۇيىمداستىرىلىپ، تازالاۋ جۇمىستارى جۇرگىزىلگەنىن حابارلادى.

«جۇمىستار كۇشەيتىلگەن رەجيمدە جۇرگىزىلىپ جاتىر. قىسقا مەرزىمدە تولىق اياقتاۋ جوسپارلانۋدا. قورىتىندىسى بويىنشا قوسىمشا فوتوەسەپ ۇسىنىلادى. جاعداي تۇراقتى باقىلاۋدا»، – دەپ مالىمدەدى باسقارما.

اكىمدىك بۇل جاعداي ۋاقىتشا ەكەنىن جانە باقىلاۋسىزدىققا بايلانىستى ەمەس ەكەنىن اتاپ ءوتتى.

ايتا كەتەيىك، بۇعان دەيىن 2025 جىلى وسى وڭىردەگى جاۋاپتى كومپانيالاردىڭ ءبىرى ەكولوگيالىق تالاپتاردى بۇزعانى ءۇشىن 3،6 ملن تەڭگەگە ايىپپۇل ارقالاعان.