Beineý aýdanynda ornalasqan kóne Beket Ata jerasty meshitine tabiǵi gaz berildi. Saltanatty sharaǵa oblys ákimi Nurdáýlet Qilybai qatysty, – dep habarlaidy Dalanews.kz
Joba jeke kásipkerdiń qarajaty esebinen 2025 jyldyń qańtarynda bastalyp, úsh aiǵa jýyq ýaqyt ishinde tolyq aiaqtaldy. Jalpy uzyndyǵy 3,4 shaqyrymdy quraityn gaz qubyrynyń tartylýy – meshitke kelýshiler úshin qolaily jaǵdai jasap qana qoimai, tarihi nysannyń saqtalýyna da oń áserin tigizbek.
Sharada sóz sóilegen Beket Atanyń jetinshi urpaǵy Tashov Qalymbegi ata búgingi tabiǵi gazdyń tartylýy – ata-babalar amanatyna degen qurmettiń belgisi ekenin atap ótti.
- Beket Ata meshitine tabiǵi gaz tartylýy – bul tek turmystyq qolaily jaǵdai ǵana emes, babalar murasyna degen qurmettiń aiqyn kórinisi. Kieli oryndarymyzdyń saqtalýy – bolashaq urpaqqa amanat. Osy igilikti iske atsalysqan jandarǵa alǵysym sheksiz, berekemiz arta bersin, - dedi Tashov Qalymbegi ata.
Beket Ata jerasty meshiti – Qazaqstannyń jalpyulttyq sakraldy nysandarynyń biri. 1771-1775 jyldary turǵyzylǵan bul erekshe sáýlet týyndysy jartasqa oiylyp salynǵan jáne úsh bólmeden turady. Meshittiń negizgi bólmesi dóńgelek pishinde jobalanyp, tóbesi jazyq kúmbez tárizdi jasalǵan. Onyń syrtqy kelbeti qazaqtyń dástúrli kiiz úiine uqsaidy.
