Amal merekesi qarsańynda Mańǵystaý oblysy, Túpqaraǵan aýdany, Fort-Shevchenko qalasynda Muryn jyraý Seńgirbekuly atyndaǵy jańa aýdandyq óner mektebi ashyldy, - dep habarlaidy Dalanews.kz
Óner besiginiń ashylý saltanatyna Mańǵystaý oblysynyń ákimi Nurdáýlet Qilybai, Qazaqstannyń eńbek sińirgen qairatkeri, belgili kúishi Serjan Shákirat, qurmetti professor,Mańǵystaý óner kolledjiniń oqytýshysy Amanbek Súndetov jáne ata-analar men oqýshylar, aýdan turǵyndary qatysty.
Saltanatty sharada aimaq basshysy turǵyndardy jańa balalar óner mektebiniń ashylýymen quttyqtap, izgi tilegin jetkizdi.
"Memleket basshysy árdaiym Mańǵystaý óńirine erekshe kóńil bóledi. Mádeniet – aiasy keń uǵym. Búgingi jastardyń básekege qabiletti bolyp, eldiń aldyńǵy qatarynan kórinýi úshin, eń aldymen, mádenietti úiretý kerek. Al jas urpaqqa úlgi kórsetý – bizdiń mindetimiz. Búgin ashylǵan jańa óner mektebi jas talanttardy tárbielep, olardyń shyǵarmashylyq qabiletterin shyńdaityn mańyzdy ortalyqqa ainalaryna senemin. Bul mektepten shyqqan shákirtter bolashaqta elimizdiń ǵana emes, álemniń túkpir-túkpirinde tanymal bolsyn!" – dedi Nurdáýlet Qilybai.
Zamanaýi óner ordasy dombyra, qobyz, baian, fortepiano, án-terme, vokal, bi, beineleý óneri, qolóner, toǵyzqumalaq, doiby, drama jáne hor úiirmeleri boiynsha 1500-ge jýyq oqýshyny ónerge baýlyp otyr. Jańa nysanda 400 oryndyqty kórermen zaly bar.
Balalardyń boiyndaǵy qabiletin shyńdaý maqsatynda tusaýyn kesken mektepke oqýshylar 7-8 jastan bastap qabyldanady. Oqýshylar hareografiia synyptarynda 7 jyl, dombyra úiirmesinde 5 jyl bilim alyp, arnaiy kýálik alady.
Jańa óner ordasynyń ashylý saltanaty aiasynda Qazaqstan Jazýshylar odaǵynyń múshesi, jýrnalist, Túpqaraǵan aýdanynyń Qurmetti azamaty, birneshe kitaptyń avtory Aisaǵali Qydyrdyń «Mańǵystaýdaǵy alǵashqy AVTO sharýashylyq» atty kitabynyń tusaýy kesildi.
Bul eńbek 1957 jyly kolonna retinde qurylyp, ýaqyt óte avtobazaǵa ainalǵan, keiinnen irgeli kásiporynǵa ósip-jetilgen Fort-Shevchenko 1804 avtokólik kásipornynyń tarihy men eńbek ujymyna arnalǵan.
