Mańǵystaý oblysynyń ákimi Nurdáýlet Qilybaidyń tóraǵalyǵymen ótken apparattyq jiynda «Kendirli» kýrorttyq demalys aimaǵyn damytý máselesi qaraldy, - dep habarlaidy Dalanews.kz.
Jiynda Jańaózen qalasynyń ákimi Janseiit Qainarbaev qazirgi tańda atqarylyp jatqan jumystar týraly baiandap, aldaǵy josparlaryn bólisti.
Onyń aitýynsha, Kendirli aýylynyń egjei-tegjeili josparlaý jobasymen biriktirilgen bas jospardy túzetý jumystary 2025 jyldyń II toqsanynda aiaqtalady.
Kendirliniń týristik jáne ekonomikalyq áleýetin arttyrý úshin kólik qatynasyn jaqsartý maqsatynda «Jetibai – Jańaózen – Kendirli – Túrkimenstan shekarasy» baǵyty boiynsha avtojoldy qaita jańartý jumystary bastalady. Jalpy uzyndyǵy 156 shaqyrymdy quraityn bul jol IV tehnikalyq sanatqa jatady. Jóndeý jumystary aiasynda jol tósemin nyǵaitý jáne jańartý josparlanǵan.
Aimaqqa qoljetimdilikti arttyrý úshin Kendirlide jańa áýejai qurylysy bastaldy. Prezidenttiń Qazaqstan halqyna Joldaýynda bergen tapsyrmasyna sáikes, áýejai úshin 599 gektar jer telimi bólindi. Qazirgi ýaqytta joba ázirlenýde. Bolashaq áýejaidyń ótkizý qabileti saǵatyna 200 jolaýshyny qurap, jylyna 30 myńnan 60 myń jolaýshyǵa qyzmet kórsetýge múmkindik beredi. Jobanyń sátti iske asýy óńirge týrister legin arttyrýǵa yqpal etedi.
Kendirlidegi taǵy bir mańyzdy joba – táýligine 50 000 tekshemetr sý tushytatyn zaýyt qurylysy. Keshendi iske qosý 2025 jyldyń mamyr aiyna josparlanǵan.
Sondai-aq, Kendirliden aimaqtyń tarihi-mádeni oryndaryna baratyn jańa týristik marshrýt ázirlenýde.
Kýrorttyq aimaqty damytý aimaq ekonomikasyna da oń áser etpek. Jobany júzege asyrý nátijesinde jylyna 600 myńnan astam otandyq jáne sheteldik týrist tartý josparlanǵan. Sonymen qatar, bul bastama 15 myńnan astam turaqty jumys ornyn qurýǵa múmkindik beredi.
Oblys ákimi Nurdáýlet Qilybai Kendirli kýrorttyq aimaǵyn damytýda infraqurylymdy jetildirýdiń mańyzdylyǵyn atap ótip, osy baǵyttaǵy jumystardy kún tártibinen túsirmeýdi tapsyrdy.
"Memleket basshysy Qasym-Jomart Toqaev Kendirli demalys aimaǵyn damytý jumystaryn jedeldetýdi tapsyrǵan bolatyn. Búgingi tańda basty másele – infraqurylym júrgizý. Odan keiingi qadam – týristerdi tartý. Osy maqsatta barlyq sharalardy ýaqtyly ári sapaly oryndańyzdar", – dedi Nurdáýlet Qilybai.
