57 jastaǵy Sáken Musaibekov «Barys» hokkei klýbynyń bas direktory bolyp taǵaiyndaldy. Aita keteiik, ol qazir Qazaqstan shaibaly hokkei federatsiiasynyń bas direktory qyzmetin atqarady, sondai-aq, QR Ulttyq Olimpiada komitetinde qysqy sport túrleri boiynsha vitse-prezident. Ol buryn basy daýǵa iligip, sotty bolǵan, dep habarlaidy Dalanews.kz.
Sporttyq basylymdardyń biriniń málimetinshe, bul jaǵdaiǵa qatysty shaibaly hokkeiden Qazaqstan quramasynyń burynǵy memlekettik jattyqtyrýshysy Sergei Shavernev pikir bildirgen.
"Bul biz úshin jańalyq emes. Hokkeidiń ainalasynda júrgender bildi. Musaibekov Qazaqstan hokkei federatsiiasynyń bas direktory bolyp taǵaiyndalǵannan keiin onyń ári qarai ósetinin túsindik. Qazir Musaibekovtiń qolyna bilik ótip jatyr. Ol baiaǵyda-aq qolǵa alynýy tiis mindetti - Olimpiada oiyndaryna joldama alý máselesin kóterdi. Alaida bul ázirge tek uran, naqty is-áreketter qajet. "Barys" klýbynyń direktory qyzmeti burynnan beri klýbtyń ishki jáne syrtqy jumystaryn alǵa jyljytý úshin qajet edi. Oiynshylarmen kelisimsharttar jasaý, legionerlerge qatysty sheshimder qabyldaý, olardy kelisimge tartý úshin qarajat tabý siiaqty naqty jumystar atqarylýy kerek. Klýb direktorynyń qyzmeti birazdan beri bos turǵan edi, al bul yńǵaily adam. Eń aldymen Qazaqstan hokkei federatsiiasynyń prezidenti Mamin úshin yńǵaily adam. Sonymen qatar, Musaibekov sheneýnikterdiń mentalitetin jaqsy biledi, óitkeni ózi de uzaq ýaqyt memlekettik qyzmette jumys istegen. Sondyqtan da oǵan senim artyp otyr", - deidi Shavernev Sports.kz tilshisine bergen suhbatynda.
Aita keteiik, Musaibekov 2021 jyly Qylmystyq kodekstiń 190-baby 3-bóliginiń 1-tarmaǵy boiynsha iri kólemde alaiaqtyq jasady dep aiyptalǵan. Tergeý materialdaryna sáikes, ol býkmekerlik biznestegi múddelerdi qorǵap, qamqorlyq kórsetý úshin "Exirius" JShS basshysynan 6,2 mln teńge para alǵan. Onyń ishinde 4 mln teńgege Hermes áielder sómkesi satyp alynǵany anyqtalǵan.
Keiin Sáken Musaibekov kinásin moiyndap, memleketke 62 mln teńge kóleminde aiyppul tólep, jaýapkershilikten bosatylǵan.
