57 جاستاعى ساكەن مۇسايبەكوۆ «بارىس» حوككەي كلۋبىنىڭ باس ديرەكتورى بولىپ تاعايىندالدى. ايتا كەتەيىك، ول ءقازىر قازاقستان شايبالى حوككەي فەدەراسياسىنىڭ باس ديرەكتورى قىزمەتىن اتقارادى، سونداي-اق، ق ر ۇلتتىق وليمپيادا كوميتەتىندە قىسقى سپورت تۇرلەرى بويىنشا ۆيسە-پرەزيدەنت. ول بۇرىن باسى داۋعا ىلىگىپ، سوتتى بولعان، دەپ حابارلايدى Dalanews.kz.
سپورتتىق باسىلىمداردىڭ ءبىرىنىڭ مالىمەتىنشە، بۇل جاعدايعا قاتىستى شايبالى حوككەيدەن قازاقستان قۇراماسىنىڭ بۇرىنعى مەملەكەتتىك جاتتىقتىرۋشىسى سەرگەي شاۆەرنيەۆ پىكىر بىلدىرگەن.
"بۇل ءبىز ءۇشىن جاڭالىق ەمەس. حوككەيدىڭ اينالاسىندا جۇرگەندەر ءبىلدى. مۇسايبەكوۆ قازاقستان حوككەي فەدەراسياسىنىڭ باس ديرەكتورى بولىپ تاعايىندالعاننان كەيىن ونىڭ ءارى قاراي وسەتىنىن تۇسىندىك. ءقازىر مۇسايبەكوۆتىڭ قولىنا بيلىك ءوتىپ جاتىر. ول باياعىدا-اق قولعا الىنۋى ءتيىس مىندەتتى - وليمپيادا ويىندارىنا جولداما الۋ ماسەلەسىن كوتەردى. الايدا بۇل ازىرگە تەك ۇران، ناقتى ىس-ارەكەتتەر قاجەت. "بارىس" كلۋبىنىڭ ديرەكتورى قىزمەتى بۇرىننان بەرى كلۋبتىڭ ىشكى جانە سىرتقى جۇمىستارىن العا جىلجىتۋ ءۇشىن قاجەت ەدى. ويىنشىلارمەن كەلىسىمشارتتار جاساۋ، لەگيونەرلەرگە قاتىستى شەشىمدەر قابىلداۋ، ولاردى كەلىسىمگە تارتۋ ءۇشىن قاراجات تابۋ سياقتى ناقتى جۇمىستار اتقارىلۋى كەرەك. كلۋب ديرەكتورىنىڭ قىزمەتى ءبىرازدان بەرى بوس تۇرعان ەدى، ال بۇل ىڭعايلى ادام. ەڭ الدىمەن قازاقستان حوككەي فەدەراسياسىنىڭ پرەزيدەنتى مامين ءۇشىن ىڭعايلى ادام. سونىمەن قاتار، مۇسايبەكوۆ شەنەۋنىكتەردىڭ مەنتاليتەتىن جاقسى بىلەدى، ويتكەنى ءوزى دە ۇزاق ۋاقىت مەملەكەتتىك قىزمەتتە جۇمىس ىستەگەن. سوندىقتان دا وعان سەنىم ارتىپ وتىر"، - دەيدى شاۆەرنيەۆ Sports.kz تىلشىسىنە بەرگەن سۇحباتىندا.
ايتا كەتەيىك، مۇسايبەكوۆ 2021 جىلى قىلمىستىق كودەكستىڭ 190-بابى 3-بولىگىنىڭ 1-تارماعى بويىنشا ءىرى كولەمدە الاياقتىق جاسادى دەپ ايىپتالعان. تەرگەۋ ماتەريالدارىنا سايكەس، ول بۋكمەكەرلىك بيزنەستەگى مۇددەلەردى قورعاپ، قامقورلىق كورسەتۋ ءۇشىن "Exirius" ج ش س باسشىسىنان 6،2 ملن تەڭگە پارا العان. ونىڭ ىشىندە 4 ملن تەڭگەگە Hermes ايەلدەر سومكەسى ساتىپ الىنعانى انىقتالعان.
كەيىن ساكەن مۇسايبەكوۆ كىناسىن مويىنداپ، مەملەكەتكە 62 ملن تەڭگە كولەمىندە ايىپپۇل تولەپ، جاۋاپكەرشىلىكتەن بوساتىلعان.
