Semei qalasynda Úkimet basshysyna qalanyń 2020-2025 jyldarǵa arnalǵan áleýmettik-ekonomikalyq damýynyń keshendi josparynyń, "Jumyspen qamtýdyń jol kartasy – 2020" jáne "Nurly jer" baǵdarlamalarynyń oryndalýy týraly baiandaldy.
Atap aitqanda, A. Mamin Abai atyndaǵy alańdy, mýzei men teatrdy rekonstrýktsiialaý jumystarymen, sondai-aq "Qaraǵaily" shaǵyn aýdany men kópbeiindi mádeni-sport kesheniniń qurylysymen tanysty.
"Semei táýelsiz Qazaqstannyń mádeni, rýhani murasy men tarihynda airyqsha oryn alady. El basshylyǵy qalanyń áleýmettik-ekonomikalyq damýyna jáne turǵyndardyń ómir súrý sapasyn arttyrýǵa erekshe kóńil bóledi", — dep A. Mamin, qalany damytý boiynsha barlyq josparlanǵan jobalardy ýaqytyly iske asyrýdy qamtamasyz etýdi tapsyrdy.
Premer Abaidyń ádebi memorialdyq murajaiynda bolyp, qundy jádigerlermen tanysty. Atqarylyp jatqan jumystarǵa kýá boldy. Sondai-aq premer ministrge biylǵy mereitoi aiasynda hákimniń tabany tigen qara shańyraq aldyna aqyn men uldarynyń birge turǵan eskertkishi qoiylatyny jaily jetkizildi. Mundai eskertkish elimizde áli qoiylǵan joq.
Asqar Mamin aqynnyń 175 jyldyǵyna orai eń mańyzdy is-sharalar ótetin Abai teatryndaǵy jóndeý jumystarynyń barysymen de tanysty. Jóndeý jumystarynyń barysyna oblys ákimi, qala ákimi, oblystyq mádeniet basqarmasy tarapynan qatań baqylaý júrgizilip jatyr.
"Teatrdyń ishi de ózgeredi. Ekinshi qabattyń foiesi basqasha kórinip, kórermender zaly da ózgeredi. Abai mereitoiyna orai teatr ártisteri jańartylǵan sahnaǵa shyǵatyn bolady" , – dep jetkizdi óńir basshysy.
Búginde Semei shaharynda Abai alańynda da aýqymdy jóndeý jumystary bastalǵan bolatyn. Alańnyń beinesi tolyǵymen ózgeredi.
Joba boiynsha bordiýrlerdi jańartý, oishyldyń qurmetine arnalǵan eskertkishti jaryqtandyrý qarastyrylǵan. Sport jáne balalar alańdary, avtokólikterge arnalǵan turaq, sýburqaq salynady. Merdiger «Firma Aziia» JShS barlyq jumystar shilde aiyna deiin aiaqtalatynyn ýáde etedi.
Budan soń Mamin Abai aýdanynyń ákimshilik ortalyǵy Qaraýyl aýylynda áleýmettik jáne injenerlik infraqurylymynyń damýyn tekserdi. Munda Úkimet basshysyna 300 orynǵa arnap salynyp jatqan orta mektep qurylysy, Abai atyndaǵy saiabaqty salý, sondai-aq eldi mekenniń sý tartý jelilerin rekonstrýktsiialaý týraly baiandaldy.
Premer-Ministr Abaidyń "Jidebai-Bórili" memlekettik tarihi-mádeni jáne ádebi-memorialdyq qoryq mýzeiine baryp, onda "Abai-Shákárim" memorialdyq keshenin restavratsiialaý jumystarynyń barysymen tanysyp, Abaidyń mýzei úiin aralady.
Úkimet basshysy Abaidyń 175 jyldyǵyna orai josparlanǵan Semeidegi jáne Abai aýdanyndaǵy tarihi-mádeni nysandardy jóndeý jáne jańǵyrtý jumystaryn ýaqytyly ári sapaly aiaqtaýdy tapsyrdy.
"Mereitoi memlekettik deńgeide atalyp ótedi. Bul shara Qazaqstan halqy úshin úlken ideologiialyq jáne tarihi mánge ie", — dedi A. Mamin.
[video width="960" height="540" mp4="https://dalanews.kz/wp-content/uploads/2020/05/VID-20200517-WA0010.mp4"][/video]
