سەمەي قالاسىندا ۇكىمەت باسشىسىنا قالانىڭ 2020-2025 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارىنىڭ، "جۇمىسپەن قامتۋدىڭ جول كارتاسى – 2020" جانە "نۇرلى جەر" باعدارلامالارىنىڭ ورىندالۋى تۋرالى باياندالدى.
اتاپ ايتقاندا، ا. مامين اباي اتىنداعى الاڭدى، مۋزەي مەن تەاتردى رەكونسترۋكسيالاۋ جۇمىستارىمەن، سونداي-اق "قاراعايلى" شاعىن اۋدانى مەن كوپبەيىندى مادەني-سپورت كەشەنىنىڭ قۇرىلىسىمەن تانىستى.
"سەمەي تاۋەلسىز قازاقستاننىڭ مادەني، رۋحاني مۇراسى مەن تاريحىندا ايرىقشا ورىن الادى. ەل باسشىلىعى قالانىڭ الەۋمەتتىك-ەكونوميكالىق دامۋىنا جانە تۇرعىنداردىڭ ءومىر ءسۇرۋ ساپاسىن ارتتىرۋعا ەرەكشە كوڭىل بولەدى"، — دەپ ا. مامين، قالانى دامىتۋ بويىنشا بارلىق جوسپارلانعان جوبالاردى ۋاقىتىلى ىسكە اسىرۋدى قامتاماسىز ەتۋدى تاپسىردى.
پرەمەر ابايدىڭ ادەبي مەموريالدىق مۇراجايىندا بولىپ، قۇندى جادىگەرلەرمەن تانىستى. اتقارىلىپ جاتقان جۇمىستارعا كۋا بولدى. سونداي-اق پرەمەر مينيسترگە بيىلعى مەرەيتوي اياسىندا ھاكىمنىڭ تابانى تيگەن قارا شاڭىراق الدىنا اقىن مەن ۇلدارىنىڭ بىرگە تۇرعان ەسكەرتكىشى قويىلاتىنى جايلى جەتكىزىلدى. مۇنداي ەسكەرتكىش ەلىمىزدە ءالى قويىلعان جوق.
اسقار مامين اقىننىڭ 175 جىلدىعىنا وراي ەڭ ماڭىزدى ءىس-شارالار وتەتىن اباي تەاترىنداعى جوندەۋ جۇمىستارىنىڭ بارىسىمەن دە تانىستى. جوندەۋ جۇمىستارىنىڭ بارىسىنا وبلىس اكىمى، قالا اكىمى، وبلىستىق مادەنيەت باسقارماسى تاراپىنان قاتاڭ باقىلاۋ جۇرگىزىلىپ جاتىر.
"تەاتردىڭ ءىشى دە وزگەرەدى. ەكىنشى قاباتتىڭ فويەسى باسقاشا كورىنىپ، كورەرمەندەر زالى دا وزگەرەدى. اباي مەرەيتويىنا وراي تەاتر ارتىستەرى جاڭارتىلعان ساحناعا شىعاتىن بولادى" ، – دەپ جەتكىزدى ءوڭىر باسشىسى.
بۇگىندە سەمەي شاھارىندا اباي الاڭىندا دا اۋقىمدى جوندەۋ جۇمىستارى باستالعان بولاتىن. الاڭنىڭ بەينەسى تولىعىمەن وزگەرەدى.
جوبا بويىنشا بورديۋرلەردى جاڭارتۋ، ويشىلدىڭ قۇرمەتىنە ارنالعان ەسكەرتكىشتى جارىقتاندىرۋ قاراستىرىلعان. سپورت جانە بالالار الاڭدارى، اۆتوكولىكتەرگە ارنالعان تۇراق، سۋبۇرقاق سالىنادى. مەردىگەر «فيرما ازيا» ج ش س بارلىق جۇمىستار شىلدە ايىنا دەيىن اياقتالاتىنىن ۋادە ەتەدى.
بۇدان سوڭ مامين اباي اۋدانىنىڭ اكىمشىلىك ورتالىعى قاراۋىل اۋىلىندا الەۋمەتتىك جانە ينجەنەرلىك ينفراقۇرىلىمىنىڭ دامۋىن تەكسەردى. مۇندا ۇكىمەت باسشىسىنا 300 ورىنعا ارناپ سالىنىپ جاتقان ورتا مەكتەپ قۇرىلىسى، اباي اتىنداعى ساياباقتى سالۋ، سونداي-اق ەلدى مەكەننىڭ سۋ تارتۋ جەلىلەرىن رەكونسترۋكسيالاۋ تۋرالى باياندالدى.
پرەمەر-مينيستر ابايدىڭ "جيدەباي-بورىلى" مەملەكەتتىك تاريحي-مادەني جانە ادەبي-مەموريالدىق قورىق مۋزەيىنە بارىپ، وندا "اباي-شاكارىم" مەموريالدىق كەشەنىن رەستاۆراسيالاۋ جۇمىستارىنىڭ بارىسىمەن تانىسىپ، ابايدىڭ مۋزەي ءۇيىن ارالادى.
ۇكىمەت باسشىسى ابايدىڭ 175 جىلدىعىنا وراي جوسپارلانعان سەمەيدەگى جانە اباي اۋدانىنداعى تاريحي-مادەني نىسانداردى جوندەۋ جانە جاڭعىرتۋ جۇمىستارىن ۋاقىتىلى ءارى ساپالى اياقتاۋدى تاپسىردى.
"مەرەيتوي مەملەكەتتىك دەڭگەيدە اتالىپ وتەدى. بۇل شارا قازاقستان حالقى ءۇشىن ۇلكەن يدەولوگيالىق جانە تاريحي مانگە يە"، — دەدى ا. مامين.
[video width="960" height="540" mp4="https://dalanews.kz/wp-content/uploads/2020/05/VID-20200517-WA0010.mp4"][/video]
