Dalanews.kz "Toqaev premerdi nege ornynan almady?" degen saýalǵa jaýap bergen sarapshynyń pikirin oqyrman nazaryna usynady.
Áshimbaevtyń aitýynsha Mámindi bul qyzmetke ákelgen Toqaev emes. Qazirgi prezident bilik basyna kelmei tura, bir ai buryn Nazarbaevtyń buiryǵymen taǵaiyndalǵan. Biylǵy jylǵy Parlament sailaýynda qaita taǵaiyndalǵany bolmasa, osy ýaqytqa deiin oryntaǵy shaiqalmai kelgen sanaýly saiasatkerdiń biri osy – Mámin.
"Mámin Toqaevtyń júzine týra qarady. Jaýapkershilikten jaltarǵan joq. Eldegi ekonomikalyq hám áleýmettik problemalardy moinymen kótere bildi. Sóitip Toqaevtyń kóńilinen shyqty. Úkimettiń jumysyn eki shoqyp, bir qarap otyratyn prezidenttiń jumysyn jeńildetti.
Onyń ústine syndy da salqynqandy qabyldaidy. Toqaevtan sóz estise eńsesin túsirmeidi, kerisinshe synnan sabaq alyp, prezidenttiń kóńili tolmaǵan olqylyqtardyń kózin joiýǵa kúsh salady, sol tusqa ministrlerdi joldap, máselege orai tolyqqandy maǵlumat alýǵa tyrysady", – deidi Áshimbaev.
Sarapshynyń paiymdaýynsha Mámin Nazarbaevtyń adamy. Biraq bul onyń Toqaevty tyńdamaitynyn bildirmeidi. Kerisinshe eki basshynyń da tilin tapqan. Máminniń Nazarbaev taǵaiyndaǵan kadr sanalýy qazirgi prezidentke de tiimdi.
"Munyń bir kiltipany bar. Erteń elde Úkimet aýysqan kúni jańa komandanyń kásibi biliktiligine qatysty saiasi jaýapkershilik Toqaevtyń moinyna artylady. Dál qazir Toqaev "eldegi ekonomikalyq daǵdarys Nazarbaevtyń buiryǵymen taǵaiyndalǵan Úkimettiń tusynda týyndady" dep aita alady. Aita almasa da, meńzep óterlik quqy bar.
Tutastai alǵanda Mámindi bálensheniń, túgensheniń adamy deý ál-ázir ózekti emes. Ol bul deńgeiden ósip, aýqymynan shyǵyp ketti. Bir kezderi Ádilbek Jaqsybektiń adamy sanalǵan edi. Keiin synyptasy Kárim Másimovtiń kómegimen Úkimetke kirip aldy. Áitkenmen qazirgi Mámin burynǵy Mámin emes.
Ózi de bireýlerge yqpal eterlik qaýqar qýaty bar, tolysqan, táýelsiz tulǵa".
Sói degen Áshimbaev Máminniń tóńiregine toptasqan biraz adamnyń atyn ataǵan eken. Solardyń ishinde qurylys salasyna jaýapty Indýstriia jáne infraqurylymdyq damý vitse-ministri Qaiyrbek Óskenbaev bar.
"Máminniń mamandyǵy diplomat emes. Alaida eki prezidenttiń de tilin tapqanyna qaraǵanda kánigi diplomattan kem túspeitin mashyǵy bar. Eń bastysy Úkimetti ashsa alaqanynda, jumsa judyryǵynda ustap otyr", – deidi sarapshy.
...
Sizdiń Mámin úkimetine kóńilińiz tola ma?
Ázirlegen, Dýman BYQAI
