ساياساتتانۋشى دانيار اشىمبايەۆتىڭ پىكىرىنشە ۇكىمەت وتستاۆكاعا كەتەدى دەگەن گۋ-گۋ اڭگىمەگە ەش نەگىز جوق. مامينگە ەلباسىنىڭ دا، توقايەۆتىڭ دا كوڭىلى تولادى. 

Dalanews.kz "توقايەۆ پرەمەردى نەگە ورنىنان المادى؟" دەگەن ساۋالعا جاۋاپ بەرگەن ساراپشىنىڭ پىكىرىن وقىرمان نازارىنا ۇسىنادى.

اشىمبايەۆتىڭ ايتۋىنشا ءماميندى بۇل قىزمەتكە اكەلگەن توقايەۆ ەمەس. قازىرگى پرەزيدەنت بيلىك باسىنا كەلمەي تۇرا، ءبىر اي بۇرىن نازاربايەۆتىڭ بۇيرىعىمەن تاعايىندالعان. بيىلعى جىلعى پارلامەنت سايلاۋىندا قايتا تاعايىندالعانى بولماسا، وسى ۋاقىتقا دەيىن ورىنتاعى شايقالماي كەلگەن ساناۋلى ساياساتكەردىڭ ءبىرى وسى – ءمامين.

"ءمامين توقايەۆتىڭ جۇزىنە تۋرا قارادى. جاۋاپكەرشىلىكتەن جالتارعان جوق. ەلدەگى ەكونوميكالىق ءھام الەۋمەتتىك پروبلەمالاردى موينىمەن كوتەرە ءبىلدى. ءسويتىپ توقايەۆتىڭ كوڭىلىنەن شىقتى. ۇكىمەتتىڭ جۇمىسىن ەكى شوقىپ، ءبىر قاراپ وتىراتىن پرەزيدەنتتىڭ جۇمىسىن جەڭىلدەتتى.

ونىڭ ۇستىنە سىندى دا سالقىنقاندى قابىلدايدى. توقايەۆتان ءسوز ەستىسە ەڭسەسىن تۇسىرمەيدى، كەرىسىنشە سىننان ساباق الىپ، پرەزيدەنتتىڭ كوڭىلى تولماعان ولقىلىقتاردىڭ كوزىن جويۋعا كۇش سالادى، سول تۇسقا مينيسترلەردى جولداپ، ماسەلەگە وراي تولىققاندى ماعلۇمات الۋعا تىرىسادى"، – دەيدى اشىمبايەۆ.

ساراپشىنىڭ پايىمداۋىنشا ءمامين نازاربايەۆتىڭ ادامى. ءبىراق بۇل ونىڭ توقايەۆتى تىڭدامايتىنىن بىلدىرمەيدى. كەرىسىنشە ەكى باسشىنىڭ دا ءتىلىن تاپقان. ءماميننىڭ نازاربايەۆ تاعايىنداعان كادر سانالۋى قازىرگى پرەزيدەنتكە دە ءتيىمدى.  

"مۇنىڭ ءبىر كىلتيپانى بار. ەرتەڭ ەلدە ۇكىمەت اۋىسقان كۇنى جاڭا كوماندانىڭ كاسىبي بىلىكتىلىگىنە قاتىستى ساياسي جاۋاپكەرشىلىك توقايەۆتىڭ موينىنا ارتىلادى. ءدال ءقازىر توقايەۆ "ەلدەگى ەكونوميكالىق داعدارىس نازاربايەۆتىڭ بۇيرىعىمەن تاعايىندالعان ۇكىمەتتىڭ تۇسىندا تۋىندادى" دەپ ايتا الادى. ايتا الماسا دا، مەڭزەپ وتەرلىك قۇقى بار.

تۇتاستاي العاندا ءماميندى بالەنشەنىڭ، تۇگەنشەنىڭ ادامى دەۋ ءال-ازىر وزەكتى ەمەس. ول بۇل دەڭگەيدەن ءوسىپ، اۋقىمىنان شىعىپ كەتتى. ءبىر كەزدەرى ادىلبەك جاقسىبەكتىڭ ادامى سانالعان ەدى. كەيىن سىنىپتاسى كارىم ءماسىموۆتىڭ كومەگىمەن ۇكىمەتكە كىرىپ الدى. ايتكەنمەن قازىرگى ءمامين بۇرىنعى ءمامين ەمەس.

ءوزى دە بىرەۋلەرگە ىقپال ەتەرلىك قاۋقار قۋاتى بار، تولىسقان، تاۋەلسىز تۇلعا".

ءسوي دەگەن اشىمبايەۆ ءماميننىڭ توڭىرەگىنە توپتاسقان ءبىراز ادامنىڭ اتىن اتاعان ەكەن. سولاردىڭ ىشىندە قۇرىلىس سالاسىنا جاۋاپتى يندۋستريا جانە ينفراقۇرىلىمدىق دامۋ ۆيسە-مينيسترى قايىربەك وسكەنبايەۆ بار.

"ءماميننىڭ ماماندىعى ديپلومات ەمەس. الايدا ەكى پرەزيدەنتتىڭ دە ءتىلىن تاپقانىنا قاراعاندا كانىگى ديپلوماتتان كەم تۇسپەيتىن ماشىعى بار. ەڭ باستىسى ۇكىمەتتى اشسا الاقانىندا، جۇمسا جۇدىرىعىندا ۇستاپ وتىر"، – دەيدى ساراپشى.

...

ءسىزدىڭ ءمامين ۇكىمەتىنە كوڭىلىڭىز تولا ما؟

ازىرلەگەن، دۋمان بىقاي