Elimizdiń ornyqty kólik infraqurylymyn damytý maqsatynda QR Tuńǵysh Prezidenti – Elbasy Nursultan Nazarbaev bastamashy bolǵan «Nurly jol» memlekettik baǵdarlamasynyń oryndalý barysyna basa kóńil bólindi.
Alakól kóliniń jaǵalaýynyń shyǵys bóliginde sońǵy eki jylda 5,3 mlrd teńgege aýqymdy jumystar júrgizilgen. Jaǵalaýdy damytý jumystary jalǵasýda, jaǵalaý jiegindegi adamdar serýendeitin jol keńeitildi. Biyl 31 mlrd-tan astam teńgege 8 iri infraqurylymdyq nysandy iske asyrýdy bastaý kózdelgen: 250 orynǵa arnalǵan «Kerýen Plaza» qonaq úii, emdeý-saýyqtyrý kesheni, velosiped pen jaiaý júrginshilerge arnalǵan joldar salynady, park keńeitiledi jáne t.b. Biyl shyǵys jaǵalaýǵa 650 myń týrist keledi.
Almaty oblysynda QR Úkimetiniń basshysyna uzyndyǵy 355 shaqyrymdai bolatyn «Óskemen – Taldyqorǵan» avtojolynyń shyǵys bóligin rekonstrýktsiialaý, uzyndyǵy 184 shaqyrym bolatyn «Úsharal – Dostyq» avtojolyn salý jobasy týraly baiandaldy.
Asqar Mamin Aqshy aýylyndaǵy Alakól kóliniń qorshaýshy bógetiniń qurylys ornyn tekserdi. Nysan jaǵalaýǵa jaqyn ornalasqan aýyldardyń 2,5 myńnan astam turǵynyn tolqyndardyń saldarynan qorǵaýǵa múmkindik beredi.
Sondai-aq, Premer-Ministr Alakól kóliniń jaǵalaýyndaǵy demalys aimaǵyn abattandyrý jumystarymen tanysty. Óńirde 200-den astam týristik nysan iske qosylǵan, 450 orynǵa arnalǵan «QOQTEM GRAND RESORT» jańa qonaq úi kesheni paidalanýǵa berilýde. Biyl jańa qonaq úiler, servis nysandaryn salý arqyly týristik áleýetti damytý sharalary jalǵastyrylady. Biyl Alakól kóliniń ońtústik jaǵalaýyna 1,3 mln týrist keledi dep boljanǵan.
Qaraǵandy oblysynda «Qaraǵandy – Balqash» avtojolynyń ýchaskesindegi jumys tekserildi. Atalǵan joba boiynsha biyl 187 shaqyrymda jol qozǵalysy ashylady. Nysandy tolyq paidalanýǵa berý 2020 jylǵa josparlanǵan. «Qaraǵandy – Temirtaý» jáne «Qaraǵandy q. ainalma joly» jobalary boiynsha jumystar jyl sońyna deiin 61 shaqyrym joldy paidalanýǵa berýmen aiaqtalady.
QR Premer-Ministri Asqar Mamin Shyǵys Qazaqstan oblysy joldarynyń ýchaskelerindegi qurylystyń joǵary qarqynmen júrip jatqanyn atap ótip, Almaty jáne Qaraǵandy oblystarynyń nysandary boiynsha qurylys jumystarynyń ekpinin kúsheitýdi tapsyrdy. Qarqyndy jumys rejimi men jedeldetilgen jumyldyrý úshin jobalar qurylysynyń merzimderine tiisti túzetýler engizý qajet. Úkimet basshysy jergilikti turǵyndardy obektilerdi iske asyrýǵa tartýdyń, eńbekaqy tóleýdiń qajetti jaǵdailaryn qamtamasyz etýdiń jáne qazaqstandyq qamtý úlesin arttyrýdyń mańyzdylyǵyn atap ótti.
«Infraqurylym jumys isteýi kerek. "Óskemen – Taldyqorǵan" jáne "Qaraǵandy – Almaty" jobalary boiynsha mindet – 2020 jyly joldaǵy qozǵalysty ashý. Sapa máselesi negizgi basymdyqta bolýy qajet», – dedi A. Mamin. – Alakól kólinde týristik áleýetti damytý jumystaryn jalǵastyrý qajet. Biyl shyǵys jáne ońtústik jaǵalaýlarǵa 2 mln-ǵa jýyq týrist keledi».
