Qazaqstan Prezidenti Qasym-Jomart Toqaevtyń tapsyrmasy boiynsha Premer-ministr Asqar Mamin 23 naýryzda Almaty oblysyna jumys saparymen baryp, óńirde Tuńǵysh prezident Nursultan Nazarbaevtyń Joldaýy men tapsyrmasynda aitylǵan reformalardyń oryndalý barysymen tanysty,
Jumys sapary aiasynda Mamin Memleket basshysynyń kóktemgi sý tasqyny kezeńine daiyndyq týraly tapsyrmasynyń qalai oryndalyp jatqanyn kórdi. Dálirek aitqanda, Úkimet basshysy Qorǵas ózeninde sel jáne sý tasqynynan qorǵaný jobalarynyń iske asyrylý barysyn teksergen.
Sodan soń Premer-ministr Qazaqstan–Qytai shekarasynda taýar ainalymyn ulǵaitýǵa, Qazaqstannyń tranzittik áleýetin arttyrýǵa baǵyttalǵan Orta Aziiadaǵy asa iri «Nur joly» ótkizý beketi men «Qorǵas –Shyǵys qaqpasy» AEA qurǵaq portyna bardy.
Budan bólek, Maminge birneshe ónerkásiptik kásiporynnyń negizgi kórsetkishteri jáne jańa nysandardyń jobalary tanystyryldy: «KIF Warehouses» qoima oryndarynyń terminaly, «Feniks Fid Mills» qurama jem shyǵaratyn zaýyt, «Zaria Ltd» astyq terminaly.
Sonymen qatar Úkimet basshysy «Qorǵas» halyqaralyq shekara mańy yntymaqtastyǵy ortalyǵy men onyń aýmaǵynda ornalasqan qazaqstandyq saýda nysandaryna baryp, kelýshiler, taýarlar men kólik quraldarynyń qozǵalysyn tirkeý men baqylaýǵa arnalǵan avtomattandyrylǵan júiemen tanysty.
Taldyqorǵan qalasynda Asqar Mamin azamattardyń ál-aýqatyn arttyrýǵa arnalǵan áleýmettik nysandardy aralap, sondai-aq óńirde indýstriialandyrýdyń damýymen tanysqan.
Salynyp jatqan turǵyn úi alabyn aralap júrip, premer-ministr óńirde baspananyń qoljetimdiligin arttyrý jáne muqtaj jandardyń, onyń ishinde kópbalaly otbasylardyń turǵyn úi máselesin sheshý úshin qabyldanyp jatqan sharalardy tekserdi.
Oblys ortalyǵynda Mamin «Taldyqorǵan» indýstriialyq aimaǵyn aralap, Almaty oblysyndaǵy basqa indýstriialyq aimaqtardyń damý jobalaryn kórgen. Keiin Úkimet basshysy «Qainar AKB» akkýmýliator shyǵarý zaýytyn aralap, tehnologiialyq protsess pen shyǵarylatyn ónim jelisin baqylaǵan.
Jumys saparynyń sońynda Asqar Mamin Kásipkerlerge qyzmet kórsetý ortalyǵynyń jumysyn tekserip, sonymen qatar qalanyń áleýmettik-ekonomikalyq damýy, onyń ishinde týrizmdi jetildirý máselesimen, Almaty qalasy mańyn damytý jobasymen tanysty.
Taqyrypqa orai:
Batalov Maminge:
«Jalǵa beriletin turǵyn úiler sanyn arttyrý qajet»
Taldyqorǵanǵa jumys saparymen kelgen Premer-ministrge Almaty oblysynyń ákimi Amandyq Batalov baspana máselesi boiynsha ótinishin bildirdi.
Úkimet basshysyna oblys ákiminiń birinshi orynbasary Lázzat Turlashov óńirdegi qurylys jumystaryna qatysty málimet berip ótti.
«Biyl 784 myń sharshy metr baspanany salamyz. «Nurly jer» baǵdarlamasy boiynsha 19 mlrd 100 mln teńge qarajat bólingen. Sonyń ishinde kredittik úi 42 myń sharshy metr bolady.
Sonymen qatar qosymsha 2,8 mlrd teńgege kópqabatty segiz úidi kópbalaly otbasylarǵa salamyz», – dedi Lázzat Turlashov.
Osy sátte Almaty oblysynyń ákimi Amandyq Batalov Úkimet basshysyna óz ótinishin bildirdi.
«Asqar Uzaqbaiuly, jalǵa beriletin arendalyq turǵyn úilerdiń sanyn arttyrý jóninde ótinishimdi bildiremin. Sebebi baspana kezeginde turǵandar sany óte kóp. Bizde jobalyq-smetalyq qujattar daiyn», – dedi Almaty oblysynyń ákimi Úkimet basshysy Asqar Maminge qarata aitqan sózinde.
