Erli-zaıyptylar bıyl sáýirde Nur Otan partıasy Tóraǵasynyń birinshi orynbasary Baýyrjan Baıbekti aıyptaıtyn birneshe vıdeomaterıal jarıalaǵan bolatyn.
Aıta ketý kerek, buǵan deıin ótken eki otyrysta jaýap berýshi tarap onlaın-baılanystyń nashar ekenin, proseske jýrnalıserdiń az qatysyp jatqanyn aıtyp shaǵymdanǵan bolatyn. Búgingi otyrys Janbolat Mamaı men onyń advokattary suraǵan ZOOM platformasynda ótti. Sondaı-aq, BAQ ókilderiniń kez kelgeni úshin proses ashyq boldy. Tilshilerge tek eGov portaly arqyly tirkeýden ótý talaby qoıylǵan.
Atalǵan proseste Baýyrjan Baıbektiń múddesin zańger Aıjan Táshenova qorǵap jatqany belgili.
Ol Janbolat Mamaı men Inga Imanbaıdyń dálel qujattaryn aıtylǵan merzimde tapsyrmaı, sot talabyn óreskel buzǵanyn atap ótti. Jaýap berýshiler 2 myń betten turatyn jaýapty sotqa bir kún qalǵanda, ıaǵnı 3 maýsym kúni keshke ǵana ótkizgen.
Táshenovanyń pikirinshe, 2 myń betten turatyn jaýap qujattarynyń ishinde Mamaı men Imanbaıdyń sózin resmı rastaıtyn birde-bir qujat joq.
«Men jaýap berýshi taraptyń jaýap qujattarymen tanysyp shyqtym. Alaıda, olardyń birde-birinde dálel joq. Qujat degen qol qoıylǵan, mór basylǵan qaǵaz nemese elektrondy úlgidegi qujat bolýy tıis. Onyń ornyna túsiniksiz jazbalar, ınternet-resýrstarǵa siltemeler, BAQ betterinen alynǵan sıtatalar ǵana bar. Sondaı-aq, mór basylǵan qaǵaz da kóp, biraq olardyń eshbiri bizdiń iske qatysty emes», - dedi zańger Aıjan Táshenova.
Ol sondaı-aq, vıdeoda kórsetilgen derekterdiń árbiri shyndyqqa janaspaıtyny týraly resmı qujattardy sotqa tapsyrǵanyn málimdedi.
Atap aıtqanda, «Baıbektiń týystaryna tıesili 100 kompanıa», «Atakenttiń», «Qazaqfılmniń», «Esentaıdyń» jerleri, sonymen qatar Almatydaǵy aqyly avtoturaqtar jáne ózge de máselelerge qatysty jeke-jeke toqtalyp, árbirine jaýap berdi.
Janbolat Mamaı proses barysynda sýdıa Raıhan Sartaevanyń da, zańger Aıjan Táshenovanyń da sózin birneshe ret bóldi. Sondaı-aq, sotqa arqaý bolǵan taqyryptan aýytqyp, qazaq tiline, Baýyrjan Baıbektiń turǵylyqty meken-jaıyna qatysty taqyrypta sóıledi. Tıisinshe, sýdıa oǵan birneshe ret eskertý jasap, sot tártibin taǵy buzsa prosesten qýatynyn aıtty.
Eske salaıyq, buǵan deıin ótken eki otyrysta da sýdıa Janbolat Mamaıǵa dál osyndaı birneshe eskertý jasaǵan bolatyn.
Zańger Aıjan Táshenova da Janbolat Mamaıdyń sózi men isi qabyspaıtyny, onyń sot tóreligine múldem qurmet kórsetpeıtinin aıtty.
«Janbolat Mamaı óziniń úndeýlerinde eýropalyq, halyqaralyq standarttardy jıi mysalǵa keltiredi, sot tóreligi ústem qurý keregin aıtady. Biraq, ózi shyn ómirde bul aıtqandaryn isteı bermeıdi. Máselen, sotta aıqaılaıdy, sottyń jabyq ótip jatqanyn aıtyp shý shyǵarady, sottaǵy negizgi taqyrypty buryp, basqa másele qozǵaıdy, dálel beretin merzimdi keshiktiredi. Iaǵnı, zań ústemdigi bular úshin bos sóz.
Men ózim Eýropada sotta tájirıbeden óttim. Ol jaqta bireýdiń syrtynan negizsiz jala jabýǵa eshkimge ruqsat etilmeıdi. Óıtkeni, árbir adam, onyń ishinde ózin jýrnalıs nemese saıasatker sanaıtyn ár tulǵa biledi – bireýge qatysty aıtqan ár sózińe dáleliń bolýy shart. Olaı bolmaǵan jaǵdaıda seniń aıtqanyń bos jala jáne sol úshin sotta jaýap beresiń», - dedi A.Táshenova.
Sot eki tarapty da tyńdap, sotaldy daıyndyqtyń ótkenin, endi negizgi proses 14 maýsymda bastalatynyn habarlady. Sýdıa Raıhan Sartaeva alǵashqy otyrystyń ýaqytyn saǵat 10:00-ge bekitken. Alaıda, jaýap berýshi tarap bul ýaqytty 9.30-ǵa qoıdy surady. Sýdıa olardyń ótinishin maqul kórdi.
