Májilis depýtaty Rinat Zaiytov eldegi sý tasqyny máselesin kóterip, Úkimet basshysyna saýal joldady, dep habarlaidy Dalanews.kz.
«Pále-jala taban astynda, ony eshkim boljai almaidy. Elimiz úlken synaqty bastan keshirip jatqanyn ózińiz de bilesiz. Sý tasqynynyń alǵashqy kúnderinen bastap birneshe topqa bólingen depýtattar tabiǵi apattan zardap shekken aimaqtarǵa attandy. Bizdiń maqsatymyz – barlyǵyn óz kózimizben kórip, jergilikti halyqpen kezdesip, olardyń aryz-shaǵymdaryn tyńdap, Úkimetke jetkizý», – dedi Zaiytov.
Sondai-aq ol depýtattyń ótinishi óziniń sózi emes, baspanasynan, bar dúnie-múlkinen aiyrylsa da,eńbektegen jasynan - eńkeigen qariiasyna deiin sý aǵynymen kúresip jatqan qaisar qazaq halqynyń sózi ekenin aitty.
Qazirgi tótenshe jaǵdai tabiǵi sipatta ǵana emes, jumysyna salǵyrttyq tanytqan sheneýnikterdiń de kinási ekenin jetkizdi.
«Máselen, Atyraý oblysy men Qulsary qalasynyń mańynda zańsyz salynǵan sý qoimalary, jergilikti atqarýshy organdardyń kóktemgi sý tasqynyna daiyn bolmaýy, sý tasqynynan zardap shekkenderdiń áreketin úilestire almaý osyndai saldarǵa ákeldi. Tasqynǵa dabyl qaqqan áriptesterim D.Turǵanov, B.Bazarbek, Jyloi aýdandyq máslihatynyń depýtaty S.Sársenbaevtyń depýtattyq saýaldaryna jergilikti bilik pen jaýapty ministrlikterdiń ýaqtyly jaýap bermeýi sý tasqynynyń taǵy bir sebebi dep aita alamyz», – dedi depýtat.
Mundai nemqurailylyq pen jaýapsyzdyqqa kináli memlekettik organdardyń ókilderi jaýapqa tartylmasa, bul jalǵasa beredi dep esepteidi depýtat.
«Sondyqtan, Prezident aitqandai, jaýapkershilikten jaltaryp, bir-birine siltep, beiqamdyq tanytqan qyzmetkerler men jergilikti iri kompaniialardyń áreketi jazalanýy kerek. Is-sharalardyń naqty algoritmi ázirlenbegendikten, komissiianyń qurylýy men qyzmeti týraly turǵyndarǵa habarlanbaǵandyqtan, sý tasqynynan zardap shekken halyq áli kúnge deiin shyǵyndarynyń qalai esepteletinin jáne óteletinin bilmeidi. Sondyqtan komissiianyń jumysyn jeńildetip, halyqpen tikelei bailanys ornatý úshin onyń quramyna turǵyndardyń qurmetine bólengen jergilikti belsendi azamattardy engizý qajet dep esepteimiz», - dedi májilismen.
Ol sý tasqynynan zardap shekkenderge ýaqytsha nesie demalysyn engizýdi, sondai-aq sý tasqyny kezinde baspanasyz qalǵan azamattardy baspanamen qamtamasyz etý jumystaryn jedeldetýdi surady.
«Abai, Qostanai oblystaryndaǵy órt kezinde de, qazirgi sý tasqyny kezinde de Qazaqstan halqy birligi men tózimdiligin kórsetti. Dál osy toleranttylyq pen birliktiń arqasynda biz burynǵy bilik ókilderi men memlekettiń tutastyǵyn buzǵysy keletinderdiń barlyq kedergilerine qarsy turamyz. Bul úlken erlik! Halyqtyń barlyq talaptary óz deńgeiinde oryndalady dep senemiz», – deidi Rinat Zaiytov.
