Májilis 28 aqpanda turmystyq zorlyq-zombylyqqa jazany kúsheitetin zań jobasyn ekinshi oqylymda maquldap, senatqa joldady. Bul týraly jergilikti basylymdar habarlady.
Zań jobasyna sai, pedofiliia jáne balany óltirý qylmysyna ómir boiyna sottaý jazasy belgilenedi.
Qujatta densaýlyqqa jeńil, ortasha jáne aýyr zalal keltirýge endi qylmystyq jaza qarastyrylǵan.
"Vlast" saitynyń jazýynsha, májilis densaýlyqqa ortasha zaqym keltirgenderdi 2 jyl bas bostandyǵynan aiyrýǵa, aýyr zaqym keltirgenderdi 3-8 jyl bas bostandyǵynan aiyrýǵa kelisken.
Al densaýlyqqa jeńil zaqym keltirýge 200 AEK (738 myń teńge) aiyppul ia 200 saǵat qoǵamdyq jumysqa jegý ne 50 kúnge qamaý jazasy taǵaiyndalýy múmkin. Al qol kóterýge 80 AEK (295 myń teńge) aiyppul ne 80 saǵat qoǵamdyq jumys ia 25 kúnge qamaý jospary bar.
Buǵan deiin zańda 15 AEK (55400 teńge) jáne 15 kúnge qamaý jazasy bolǵan edi.
Keiingi ýaqytta Qazaqstanda áielderdi urý jáne turmystyq zorlyq-zombylyq máselesi jii talqylanyp júr. Saltanat Núkenovaniń qazasyna kúieýi, burynǵy ekonomika ministri Qýandyq Bishimbaevtyń kúdikti bolýy áielderdi uryp-soǵýǵa qatysty talqyny odan ári kúsheitti.
Elde jyl saiyn politsiiaǵa turmystaǵy zorlyq-zombylyq boiynsha 100 myńnan asa shaǵym túsedi. IIM málimetinshe, jyl basynan beri otbasyndaǵy zorlyq-zombylyqqa qatysty 35 myńnan asa shaǵym túsken.
BUU esebinshe, jyl saiyn Qazaqstanda 400 áiel qarym-qatynastaǵy er adamnyń qolynan qaza tabady.
