Májilis depýtaty Nurgúl Taý elordadaǵy turmystyq qaldyqtardy bólek jinaý júiesiniń jumysyna shaǵymdandy, dep habarlaidy Dalanews.kz Baq.kz-ke silteme jasap.
Depýtattyń sózinshe, Astana turǵyndary qoqysty túrine qarai bólip tastaǵanymen, ony shyǵaratyn kompaniialar báribir aralastyryp, bir tehnikaǵa tiep áketedi. Mundai jaǵdai halyqtyń suryptaýǵa degen senimin tolyqtai joiyp otyrǵanyn aitty.
«Úide tamaq qaldyqtary men qatty qaldyqtardy bólek jinaimyz. Biraq tańerteń balam eki konteinerdegi qoqysty bir ǵana kólikke aralastyryp tiep jatqanyn kórgen. Sonda bólek jinaýdyń máni qansha?» – dedi depýtat.
Ol bul júieniń qaǵaz júzinde ǵana bar ekenin kórsetetin naqty mysal ekenin jetkizdi.
Sonymen qatar Nurgúl Taý qaldyqtardy jinaý, irikteý jáne qaita óńdeý jumysymen ainalysatyn operatorlarǵa bólinetin qarjynyń tolyq tólenbeitinin de synǵa aldy. Onyń aitýynsha, 2024 jylǵa qarastyrylǵan 7,5 mlrd teńgeniń tek 4,6 mlrd teńgesi ǵana aýdarylǵan.
«Qarajattyń tolyq bólinbeýi kompaniialardyń jumysyna keri áser etedi. Aqsha jetpegen soń eń tiimsiz ádis – qoqysty órteý tásiline qaita oralyp otyrmyz», – dedi ol.
Depýtattyń aitýynsha, Astana mańyndaǵy poligondarda zańsyz qoqys oryndarynyń sany kúrt artqan. Ol jýrnalistermen birge birneshe poligondy aralap shyqqanyn, jaǵdaidyń tym kúrdeli ekenin aitty.
«Eldiń basshylyǵy otyrǵan qalanyń dál irgesinde qoqys taý bolyp jinalyp jatyr. Bul – óte uiat jaǵdai. Astana kúnnen-kúnge qoqysqa kómilip barady», – dedi Nurgúl Taý.
Ol sondai-aq Ekologiialyq kodekste burynnan belgilengen qaldyqtardy basqarý tujyrymdamasyn qaita-qaita ózgertip, jańa nusqa ázirleýge ýaqyt joǵaltýdyń qajeti joq ekenin aitty. Eń mańyzdysy – bar qujatty durystap oryndaý.
«Qujat daiyn tur. Endi ony jyl saiyn jańartpai, naqty iske kóshý kerek. Astana mańyn tazalaý jumysy áli oryndalmai jatyr», – dedi depýtat.
Sonymen birge ol «Taza Qazaqstan» aktsiialarynan keiin jinalǵan qaldyqtardyń da qaida jiberiletini anyq emes ekenin, keide ol qoqys qaitadan ruqsat etilmegen úiindilerge ainalyp ketetinin aitty.
Nurgúl Taý Ekologiia jáne tabiǵi resýrstar ministrligin qaldyqtardy suryptaý júiesin kúsheitýge, operatorlarǵa qarajat bólýdi retteýge jáne qalanyń ainalasyndaǵy zańsyz poligondardy jedel joiýǵa baǵyttalǵan naqty sharalardy qabyldaýǵa shaqyrdy.
