Marqum ánshi Mádina Eralievanyń uly Arsen Eraliev anasynyń qaitys bolǵany týraly qaraly habardy qalai estigenin eske aldy. Ol bul jaiynda "Astarly aqiqat" baǵdarlamasynda baiandady, dep habarlaidy dalanews.kz.
"Qazaqtyń Aqbaiany" atanǵan belgili ánshi tiri bolǵanda biyl 70 jasqa tolar edi. Baǵdarlama barysynda óner iesiniń ómiri men shyǵarmashylyq joly eske alyndy. Arsen Eralievtiń aitýynsha, anasynyń ómirden ótkeni týraly sýyt habardy oǵan Qazaqstannyń halyq ártisi Naǵima Esqalieva men Mádina Eralievanyń jaqyn dostary jetkizgen.
"2000 jyldyń qarasha aiy áli kúnge deiin esimde. Naǵima Esqalieva men anamnyń dostary Salman men Aleksei kelip, anamnyń ólimin estirtti. Basynda senbedim. Óń men tús arasynda júrgendei boldym. Úige adamdar jinala bastady. Búkil ánshiler, týysqandar kele bastady. Sosyn biz Qyzylordanyń Baiqońyr óńirine charterlik reispen ushyp kettik. Anamdy sol jerden denesin ózim alyp keldim. Áli kúnge deiin anamnyń kúshin sezemin. Ol meni árdaiym jelep-jebep júredi. Ýaqyt ótken saiyn saǵyna beremin", – dedi Arsen Eraliev.
Baǵdarlamada ánshiniń sińlisi Saǵira Eralieva da ápkesi týraly estelikterimen bólisti. Onyń sózinshe, Mádina Eralieva ómiriniń sońǵy ýaqyttarynda keibir dúnielerdi aldyn ala sezgendei, jaqyndaryna amanat aityp júrgen.
"Mádinanyń bir qasieti úige kelgende bir shyny aiaq shai ǵana ishetin. Sońǵy kelgende Oralmen áńgime aityp, dastarhan basynda uzaq otyrdy. Sosyn "Mamamyzdyń fotosy qaida?" dedi. Men ony óziniń alyp ketkenin aittym. "Ólgen adamdardyń fotosyn saqtap qoiý kerek eken. Jerge tastamashy" dedi. Sol kezde-aq maǵan óziniń fotolaryn tabystaǵan eken. Odan keiin Quran kitabyn syilap, meshitke jii barýymdy ótindi. "Meshitten kele jatyrmyn" desem, qatty qýanatyn. Artynan Quran oqityn adamdy daiyndaǵan bolyp tur. Arsenge bireý qatty daýys kóterse, renjip qalatyn. Sońǵy sapary Qyzylorda óńirine jolǵa shyǵaiyn dep turǵanda, kómekshisi bola tura, "Men úiden kútshi" dedi. Buryn olai aitpaityn. Biraq men barmai qaldym. Ólimin óz úiimde otyryp estidim", – dedi Saǵira Eralieva.
