مارقۇم ەنشٸ مەدينا ەراليەۆانىڭ ۇلى ارسەن ەراليەۆ اناسىنىڭ قايتىس بولعانى تۋرالى قارالى حاباردى قالاي ەستٸگەنٸن ەسكە الدى. ول بۇل جايىندا "استارلى اقيقات" باعدارلاماسىندا باياندادى, دەپ حابارلايدى dalanews.kz.
"قازاقتىڭ اقبايانى" اتانعان بەلگٸلٸ ەنشٸ تٸرٸ بولعاندا بيىل 70 جاسقا تولار ەدٸ. باعدارلاما بارىسىندا ٶنەر يەسٸنٸڭ ٶمٸرٸ مەن شىعارماشىلىق جولى ەسكە الىندى. ارسەن ەراليەۆتٸڭ ايتۋىنشا, اناسىنىڭ ٶمٸردەن ٶتكەنٸ تۋرالى سۋىت حاباردى وعان قازاقستاننىڭ حالىق ەرتٸسٸ ناعيما ەسقاليەۆا مەن مەدينا ەراليەۆانىڭ جاقىن دوستارى جەتكٸزگەن.
"2000 جىلدىڭ قاراشا ايى ەلٸ كٷنگە دەيٸن ەسٸمدە. ناعيما ەسقاليەۆا مەن انامنىڭ دوستارى سالمان مەن الەكسەي كەلٸپ, انامنىڭ ٶلٸمٸن ەستٸرتتٸ. باسىندا سەنبەدٸم. ٶڭ مەن تٷس اراسىندا جٷرگەندەي بولدىم. ٷيگە ادامدار جينالا باستادى. بٷكٸل ەنشٸلەر, تۋىسقاندار كەلە باستادى. سوسىن بٸز قىزىلوردانىڭ بايقوڭىر ٶڭٸرٸنە چارتەرلٸك رەيسپەن ۇشىپ كەتتٸك. انامدى سول جەردەن دەنەسٸن ٶزٸم الىپ كەلدٸم. ەلٸ كٷنگە دەيٸن انامنىڭ كٷشٸن سەزەمٸن. ول مەنٸ ەردايىم جەلەپ-جەبەپ جٷرەدٸ. ۋاقىت ٶتكەن سايىن ساعىنا بەرەمٸن", – دەدٸ ارسەن ەراليەۆ.
باعدارلامادا ەنشٸنٸڭ سٸڭلٸسٸ ساعيرا ەراليەۆا دا ەپكەسٸ تۋرالى ەستەلٸكتەرٸمەن بٶلٸستٸ. ونىڭ سٶزٸنشە, مەدينا ەراليەۆا ٶمٸرٸنٸڭ سوڭعى ۋاقىتتارىندا كەيبٸر دٷنيەلەردٸ الدىن الا سەزگەندەي, جاقىندارىنا امانات ايتىپ جٷرگەن.
"مەدينانىڭ بٸر قاسيەتٸ ٷيگە كەلگەندە بٸر شىنى اياق شاي عانا ٸشەتٸن. سوڭعى كەلگەندە ورالمەن ەڭگٸمە ايتىپ, داستارحان باسىندا ۇزاق وتىردى. سوسىن "مامامىزدىڭ فوتوسى قايدا?" دەدٸ. مەن ونى ٶزٸنٸڭ الىپ كەتكەنٸن ايتتىم. "ٶلگەن ادامداردىڭ فوتوسىن ساقتاپ قويۋ كەرەك ەكەن. جەرگە تاستاماشى" دەدٸ. سول كەزدە-اق ماعان ٶزٸنٸڭ فوتولارىن تابىستاعان ەكەن. ودان كەيٸن قۇران كٸتابىن سىيلاپ, مەشٸتكە جيٸ بارۋىمدى ٶتٸندٸ. "مەشٸتتەن كەلە جاتىرمىن" دەسەم, قاتتى قۋاناتىن. ارتىنان قۇران وقيتىن ادامدى دايىنداعان بولىپ تۇر. ارسەنگە بٸرەۋ قاتتى داۋىس كٶتەرسە, رەنجٸپ قالاتىن. سوڭعى ساپارى قىزىلوردا ٶڭٸرٸنە جولعا شىعايىن دەپ تۇرعاندا, كٶمەكشٸسٸ بولا تۇرا, "مەن ٷيدەن كٷتشٸ" دەدٸ. بۇرىن ولاي ايتپايتىن. بٸراق مەن بارماي قالدىم. ٶلٸمٸن ٶز ٷيٸمدە وتىرىپ ەستٸدٸم", – دەدٸ ساعيرا ەراليەۆا.
