Qazaqstan Respýblikasynyń Ulttyq kitaphanasy janyndaǵy Muhtar Áýezov ǵylymi kabinetiniń jabylatyny týraly aqparat shyndyqqa janaspaidy. Ulttyq kitaphana baspasóz qyzmetiniń habarlaýynsha, kabinet qalypty rejimde jumys istep, oqyrmandar men zertteýshilerdi qabyldaýdy jalǵastyryp jatyr, dep habarlaidy Dalanews.kz.
Muhtar Áýezovtiń ǵylymi kabineti kelýshilerge ashyq jáne kitaphananyń ekskýrsiialyq baǵytyna engizilgen. Sondai-aq, kabinet qoryndaǵy kitaptar men materialdar aldaǵy ýaqytta tolyqtyrylyp otyrady. Jazýshynyń ómiri men shyǵarmashylyǵyna arnalǵan is-sharalar da turaqty túrde ótkiziledi.
Eske sala ketsek, biyl qazan aiynda Almaty qalasyndaǵy Ulttyq kitaphananyń filialyna Muhtar Áýezovtiń esimi berilgen edi. Sol jerde jazýshynyń memorialdyq kabineti ashylyp, Áýezovtiń otbasynan birqatar jeke zattary men kitaptary syiǵa tartylǵan. Bul bastama jazýshy murasyn keńinen nasihattap, kópshilikke qoljetimdi etý maqsatynda júzege asqan edi.
