Jınalǵan ónimniń ár kelisin sharýa 800 teńgeden saýdalap, 5 mıllıon teńge paıdaǵa kenelgen. Sóıtip, bıyl lımon baǵynyń kólemin taǵy da 10 sottyqqa ulǵaıtypty. Qazir munda kóshetter topyraqqa otyrǵyzylyp, kútip-baptaýǵa alynǵan.
«Lımonnyń kóshetterin 2016 jyly Ózbekstan elinen arnaıy aldyrttyq. Jylyjaı quryp, úshinshi jyly 3 tonna, al bıyl 5 tonna ónim aldyq. Ár túp shamamen 30-40 keliden ónim berdi. Negizinen ár túp lımon 25-30 jyl ónim berýge qaýqarly», - deıdi jylyjaı baǵbany Iýldash Ablazov.
Jalpy, «Nursultan» sharýa qojalyǵynyń ıeliginde 17 gektar jer bar. Onyń 6 gektaryna shabdaly, 20 sottyǵyna júzim, 20 sottyǵyna lımon, 80 myń túp shaıly roza kóshetteri egilipti. Qojalyq tóraǵasy Murat Jumabekov aldaǵy jyly lımon kólemin taǵy da 30 sottyqqa arttyrýdy josparlap otyr.
Aıta keterligi, bul qojalyq tájirıbe retinde 2 gektar jerge qurma ekken. Alaıda saýysqan qusy daqyldyń bul túriniń ósiýine aıryqsha kedergi keltiripti.
Túrkistan oblysynyń Óńirlik komýnıkasıalar qyzmeti
