Ekonomist Maqsat Halyq Úkimettiń ekonomikalyq baǵytyna qatysty óz kózqarasyn bildirip, el Úkimetin basqarýǵa kásibi ekonomist kelýi qajet ekenin aitty. Onyń pikirinshe, Úkimet basshysy qai ekonomikalyq mektepke súienetinin, qandai ustanymdy basshylyqqa alatynyn ashyq jariialamaiynsha, qabyldanatyn sheshimderdiń logikasy men baǵyty túsiniksiz bolyp qala beredi, dep habarlaidy Dalanews.kz
Maqsat Halyqtyń aitýynsha, qazirgi tańda Úkimet basshysy ózin naqty qai ekonomikalyq baǵyttyń ókili ekenin jariia etpegen. Bul jaǵdai ekonomikalyq saiasattaǵy júielilik pen senimge keri áser etedi.
Ekonomist Prezidenttiń el ekonomikasyn yryqtandyrý, naryqtyq jáne liberaldy ekonomikany damytý jóninde naqty baǵdar bergenin eske saldy. Alaida Úkimettiń biýdjet jáne qarjy saiasatyna qatysty qabyldap otyrǵan sheshimderi, onyń ishinde bizneske túsetin qysymnyń artýy men salyq júktemesiniń kóbeiýi, liberaldy ekonomikanyń negizgi qaǵidattaryna sai kelmeidi.
«Úkimet qandai ekonomikalyq baǵytty ustanatynyn ashyq aitpaiynsha, ekonomikalyq saiasatta aiqyndyq bolmaidy. Al aiqyndyq joq jerde senim de, júielilik te qalyptaspaidy», – deidi ol.
Sonymen qatar Maqsat Halyq ekonomikalyq ósimdi tek statistikalyq kórsetkishtermen ólsheý qate ekenin atap ótti. Onyń aitýynsha, eger ekonomikalyq ósim halyqtyń tabysy men turmys sapasynyń jaqsarýyna áser etpese, ondai ósimniń naqty paidasy joq.
«Ekonomika ósip jatyr degen sandar halyqtyń ómirine áser etpese, ol tek syrtqy kórinis bolyp qalady. Mysaly, salyq mólsherlemesi 6,5 paiyzǵa ósse, soǵan sáikes jalaqy men áleýmettik tólemder de artýy kerek», – dedi ekonomist.
Maqsat Halyq Úkimet quramyndaǵy ekonomisterdi, onyń ishinde Serik Jumanǵarindi ashyq pikirtalasqa shaqyrdy. Onyń sózinshe, bul shaqyrý jeke basyn kórsetý úshin emes, kásibi deńgeide saiasi-ekonomikalyq oi alýandyǵyn qalyptastyrý maqsatynda jasalyp otyr.
«Eger men emes, basqa táýelsiz ekonomistermen ashyq pikirsaiys uiymdastyrylsa da qarsy emespin. Bizge jai talqylaý emes, naqty balamaly ekonomikalyq oilar qajet. Sonda ǵana halyq múddesine sai, tiimdi ári uzaq merzimdi ekonomikalyq baǵdarlama jasaýǵa múmkindik týady», – dedi ol.
Ekonomistiń paiymdaýynsha, el ekonomikasynyń baǵyty ashyq ári túsinikti bolǵanda ǵana qoǵamda senim artyp, qabyldanatyn sheshimderdiń sapasy jaqsarady.
