«Men qazir balamdy joqtap, jylap jatyrmyn. Qaiǵym jetedi. Áli jerlegen de joqpyn, súiegin ala almai júrmin. Balam sol kúni qonaqqa ketken adam», – deidi lańkestiń anasy Záýresh.
Darhan Qoishinniń áieli enesiniń kúieýi týraly aitqanyn unatqan joq.
«Alla Taǵalla bárin kórip tur. Ol kinásiz, biz aqtalmaimyz, aqiqatty Alla biledi»,- deidi sodyrdyń áieli.
Bir aidan keiin otyz jasqa tolatyn Darhan Qoishinniń artynda eki balasy qaldy.
«Kózimmen kórdim, bireý balamdy telefonǵa shaqyrdy. Ol ondai bolatynyn bilip barǵan joq. Qonaqqa shaqyrǵanda eki kishkentai balasyna «qaisysyn alyp ketemin» dep jarmasty. Úlkeni «men baram» dep jylaǵasyn, sony kiindirip qoidyq. Sol kezde «balalardy tastańdar» degen qońyraý keldi. Balam «qonaqqa balalaryńdy ertpei kelińder dep aitty» dedi. Olar jinalǵanda solai aitady. Balalaryńdy alyp kelińder, bolmasa tastap ketińder dep habarlaidy. Namaz oqymaityndar da balamen ne balasyz kelińder dep aitady emes pe, tap solai bolyp tur. Ákesine ere almaitynyn estip, jylaǵan balasyn ózi jubatty. Ony dúkenge ertip shyǵyp, «kinder siýrpriz» shokoladyn ákep berdi. Balasy táttige aldanǵan soń, ózi shyǵyp ketti. Biz ony qonaqqa ketti dep otyrmyz», — deidi anasy.
Ol «saqaldylar atysyp jatyr» degende ǵana balasynyń bálege urynǵanyn sezgen.
«Búkil halyq atys bolyp jatyr dep shýlaǵanda estidik. Men sol kezde birden kúdiktendim. Sebebi, ol 5-shi móltek aýdanyna qonaqqa baratynyn aityp ketken. Men ol kezde kishkentailardy ertip apamnyń úiine ketken edim. Bolǵan jaidyń bárin sol jaqtan estidim», – deidi Záýresh.
Darhan Qoishinniń úiindegi úsh áiel – sheshesi, áieli jáne qaryndasy hidjab kigen. Úidiń syrtqy esiginde úige bas suqqanda aitylatyn sózdi arab tilinde jazyp qoiǵan.
«Bári belgili nárse. Biz ony joǵalttyq. Ol endi joq. Ne oilaǵylaryń kelse, sony oilańdar», — dedi sodyrdyń qaryndasy
Ol osyny aitty da esikti jaýyp, anasyn úiine qarai súiredi. Esiktiń arasynan syǵalaǵan anasy: «Biz soǵys bolyp kete me dep qorqamyz. Aspanymyz ashyq, elimiz tynysh bolǵanǵa ne jetsin», – dedi.
