Aqtóbe qalalyq sotynyń sheshimimen Aqtóbe oblysynyń bir turǵyny terrorizmdi nasihattaǵany jáne atys qarýyn zańsyz saqtaǵany úshin kináli dep tanylyp, 9 jylǵa bas bostandyǵynan aiyryldy, - dep habarlaidy Dalanews.kz.
UQK tergegen qylmystyq is sheńberinde sottalýshy ainalasyndaǵylardy lańkester jaǵynda sheteldegi soǵys qimyldaryna qatysýǵa shaqyrǵany, sonymen qatar, ózi de olarǵa qosylýdy josparlaǵany anyqtaldy.
Tintý barysynda odan 2 avtomat, 8 tapansha, 8 myltyq, 3 sholaq qarý, jasyryn tasymaldanatyn garnitýrasymen 6 radiostantsiia, 3 tútin shashkasy, 1 jaryq granatasy jáne 581 patrony tabyldy.
Sondai-aq, UQK materialy boiynsha Almaty oblystyq sotynyń sheshimimen Kaskeleń qalasynyń bir turǵyny terrorizmdi nasihattaǵany jáne terroristik áreketterdi uiymdastyrýǵa adamdardy tartqany úshin 9 jylǵa bas bostandyǵynan aiyryldy.
Figýrant Qazaqstanda rezonansty zorlyq-zombylyq aktsiiasyn jasaý úshin lańkestik top qurýdy josparlaǵan. Osy maqsatta basqa dindar adamdarǵa lańkestik ideologiiany qabyldatyp, olardy óz qataryna tartýǵa árekettengen.
UQK málimetinshe, jyl basynan beri UQK tergegen qylmystyq ister boiynsha terroristik jáne ekstremistik qylmystar jasaǵany úshin ártúrli merzimge 34 adam, sondai-aq, 2 shetel azamaty sottalǵan. Olar terrorizmdi nasihattaǵany, dini arazdyq týdyrǵandyǵy, terroristik jáne ekstremistik toptardyń áreketine tartqany, qurǵany jáne olarǵa qatysqany, tyiym salynǵan uiymdardyń áreketine qatysqany úshin kináli dep tanylǵan.
Taǵy 23 adamǵa qatysty tergeý jalǵasyp jatyr.
